د خېبرپښتونخوا د قبائيلي ضلعې په علي مسجد سيمه کې پوليسو د فرنټير کور (اېف سي) د يو اهلکار مړى موندلى دى.
امنیتي سرچینې وایي د افغانستان سره په پوله پرتې د خېبر پښتونخوا د قبایلي ضلعې علي مسجد سیمه د ملیشه ځواکونو د یو عسکر مړی موندل شوی دی.
د اتوار-یکشنبې په ورځ امنیتي سرچینو وي او ای ډیوه ته ویلي موندل شوی مړی د کپتان په نوم د ایف سي د یو عسکر دی چې له تېرو دوؤ ورځو راهسې لادرکه ؤ.
دغه سرچینې ډیوه ته وویل چې کپتان نومې دا عسکر په رخصتۍ کلي ته تللی ؤ چې بیا په مرموزه توګه لادرکه شوی ؤ اؤ د اتوار په ورځ یې مړی د علي مسجد د توده مینه کندو څخه موندل شوی دی.
په سمدستي توګه د دغه عسکر د وژلو ذمه واري چا په غاړه نه ده اخستې اؤ پولیسو د هغه مړی دپوسټ مارټم لپاره د جمرود روغتون ته لیږلی دی.
د افغانستان اؤ پاکستان د ګډې پولې ترڅنګ پرتې سیمې علي مسجد کې د تېرو څو میاشتو راهسې د امنیت وضعه زیاته ګډه وډه شوې ده اؤ د روانې ستمبر میاشتې په دویمه نیټه هم د ترهګرۍ ضد محکمې پولیسو (سي ټي ډي) دعوه کړې وه چې د علي مسجد په شاګۍ سیمه کې یې د یوې نښتې په مهال درې ترهګر وژلي دي.
تر دې وړاندې په 25مه جولای د خېبر په علي مسجد سیمه کې د یو جومات دننه ځانمرګی برید شوی ؤ چې په کې د عدنان اپریدي په نوم د پولیسو یو افسر یا ایډیشنل ایس ایچ او وژل شوی ؤ .
په نهم اګست د سي ټي ډي پوليس ایډيشنل ايي جي سهېل خالد په يوه خبري غونډه کې دعوه کړې وه چې د خېبر د علي مسجد په پېښه کې ککړ ټول ورانکاري او سهولت کار نيول شوي دي.
دڅېړنیزو ادارو رپورټونه ښیي چې د ترهګرۍ په روانه څپه کې تر ټولو زیات بریدونه د خېبر پښتونخوا په قبایلي ضلعو کې شوي دي اؤ ورپسې په دوهم نمبر بیا بلوچستان صوبه د ترهګرۍ سره مخ پاتې شوې ده.
پاکستان کې د یوې غیر دولتي څېړنیزې ادارې پاکستان انستيټیوټ فار کنفلکټ اینډ سیکورټي سټديز تازه رپورټ وایي سږ کال داګست په میاشت کښې په ګرد هیواد کښې د ترهګرۍ 99 پیښې رپورټ شوې دي چې دا د 2014م نه راپدېخوا په یوه میاشت کښې تر تولو زیاتې پېښې دي.
د پاکستان پوځ څو واري د ترهګرو تنظیمونو پرضد په پراخه کچه عملیات کړي دي اؤ څو واري یې دا دعوې هم کړې دي چې د ترهګرو ملا یې ماته کړې ده خو د غیر دولتي ادارو رپورټونه وايي په کابل د طالبانو له واکمنېدو وروسته په پاکستان کښې ترهګري یو ځل بیا سیوا شوې ده.
پاکستان هیواد کې د ترهګرۍ د چټک شوي بهیر تور افغانستان کښې په موجودو ترهګرو تنظیمونو لګوي خو په افغانستان واکمن طالب چارواکي بیا دا تورونه ردوي اؤ وایي په افغانستان کې ترهګرې ډلې نه شته.