د خېبرپښتونخوا د مرکزي ښار پېښور په څوکنو کې د يو افغان کډوال مړی په دې تور په هديره کې ښخېدو ته نه دی پرېښودل شوی چې د ده پلار کله د پېښور نه د کډوالۍ نه بيرته افغانستان ته ستون شوی د پاکستاني بېرغ سپکاوی یې کړی وو.
په پېښور کې د افغان کونسلګرۍ چارواکي تاييدوي چې دغه مړی بيا افغانستان ته لېږل شوی دی.
د پېښور د څوکنو پوليس تاڼې يو افسر (اېس ايي، سب انسپکټر) حسن خان وي او اې ډيوه سره په خبرو کې وويل، پرون د جمعې په ورځ (18 جون) ورته خبر ترلاسه شوی چې د څوکنو په دريا خان بابا هديره کې جګړه ده، خو وايي چې هلته ورغلو نو د کلي مشرانو ورته وويل چې د دې مړ شوي تن پلار چې کله د تورخم نه واوړېد د پاکستاني بېرغ سپکاوی يې کړی دی.
هغه وويل د کلي مشرانو ته یې وويل چې مړی ښخېدو ته پرېږدي خو وايي هغو کښنستی قبر ډک کړی او مړی يې ښخېدو ته نه دی پرېښودی.
د څوکنو د هديرې د قبر ويډيو چې په ټولنيزو رسنیو خپره شوې يو تن پکې د بېرغ د سپکاوي خبره کوي او وايي دغه مړی دې هند ته ولېږل شي او ځينې نورې دغه ډول خبرې کوي.
د پوليس سرچينې وي او اې ډيوه ته ویلي په ویډيو کې چې خبرې کوي هم دغه تن هدايت الله دی.
هدايت الله چې د څوکنو سره تعلق دی وايي د تعليم په محکمه کې دنده ترسره کوي او هغه هم پرون دغلته ورغلی دی وايي په مقبره کې يې ځای نشته ځکه هلته د بهر مړي نه پرېږدي خو وايي چې يو چا د دغه مړي په اړه ويلي چې پلار يې د پاکستاني بېرغ سپکاوی کړی وو.
په پېښور کې د افغان کډوالو د ځوانانو د کمېټۍ مشر نقيب الله ايوبي وايي دوی په دغه پېښه خبر شوي او د څوکنو نه ورته مالومات ترلاسه شوي چې هغه مړی جلال اباد ته وړل شوی دی.
د پېښور په کونسلګرۍ د افغان کډوالو دپاره کارکوونکي چارواکي وي او اې ډيوه ته د نوم نه څرګندولو وويل ، چې دغه مړی چې ښخېدو ته نه دی پرېښودی شوی دا هغه مړی دی چې نزدې يوه اوونۍ وړاندې په ننګرهار کې کشتۍ ډوبه شوې وه دا مړی سيند راوړلی او د پېښور په ورسک کې نيول شوی وو.
د چارواکي په وېنا د ده ماماګان چې په څوکنو کې اوسي هغو يې پېژندګلو کړې او دغه مړی يې بيا دلته ښخولو خو خلکو نه دی پرېښودی او بيا بيرته لېږل شوی دی.
هغه وويل د دغه مړي کورنۍ د ننګرهار په کامې ولسوالۍ کې اوسيږي.
د ملګرو ملتونو د کډوالو ادارې (يو اېن اېچ سي ار) ترمخه د شمېرو ترمخه په پاکستان کې 14 لکه رجسټرډ کډوال ژوند کوي او د غېر رجسټرډ کډوالو شمېره هم په لکونو کې ده.