ناتاییده رپورټونه وايي د افغانستان پکتیکا ولایت کې د پاکستاني طالبانو په یو ګاډي شکمن ډرون برید شوی چې پکې لږ تر لږه اته طالبان وژل شوي دي.
د یکشنبې په ورځ په افغان رسنیو اؤ سوشل میډیا اطلاعات مخې ته راغلي چې دا برید د پکتیکا د ګومل ولسوالۍ په ترخه سیمه کې د پاکستاني طالبانو په یو ګاډي شوی دی خو په افغانستان واکمنو طالبانو لا دا برید نه دی تایید کړی.
افغان رسنیو دعوه کړې ده چې برید د ټي ټي پی د کمانډر ضرار ګنډا پور په وسله والو شوی اؤ اته واړه وژل شوي وسله وال د ضرار ګنډاپور په وسله واله ډله پسې تړاؤ لري.
په پاکستاني طالبانو دا شکمن برید کابل ته د پاکستان د کورنیو چارو د سکتر محمد خرم اغا له وروستي سفر او طالب چارواکو سره له لیدنې یوازې درې ورځې وروسته شوی دی.
د پاکستان د بهرنيو چارو وزارت ويلي، د وزيراعظم په لارښوونه د پاکستان د کورنیو چارو د سکتر محمد خرم اغا په مشرۍ یو پاکستاني پلاوي په 30مه مئ د کابل سفر کړی او افغانستان کې واکمنو طالبانو د کورنيو چارو د مرستیال وزیر محمد نبي عمري سره یې تفصيلي ملاقات شوی دی.
د پاکستان د بهرنیو چارو د وزارت له لوري ويل شوي وؤ"په ليدنه کې د بشام د 26م مارچ د ترهګر بريد په اړه بحث شوی، د کورنيو چارو سکتر د پاکستان د حکومت لخوا د بشام د بريد په اړه د شوو پلټنو نتيجې افغان طالبانو سره شريکې کړي او افغانستان څخه یې په پېښه کې ککړو کسانو نيولو کې مرسته غوښتې ده"
په 26م مارچ د خېبرپښتونخوا د شانګلې ضلعې په بشام کې د داسو ډېم په چينايي انجينيرانو ځانمرګی برید شوی ؤ چې پينځه چينايي وګړي او پاکستانی ډرايور یې پکې وژل شوي وو. هغه وخت تحريک طالبان پاکستان د دغه بريد څخه د لاتعلقۍ اعلان کړی و.
خو د پاکستان حکومتي او پوځي مشرانو د دغه پېښې زمه واري په تحریک طالبان پاکستان ور اچولې، او تور یې لګولی چې د افغانستان خاوره په دوامداره توګه د پاکستان پرضد د ترهګرۍ دپاره کارول کیږي.
د طالبانو د حکومت ویاند ذبیحالله مجاهد د پاکستان تورونه رد کړي اؤ ویلي یې دي، اسلاماباد په دې هڅه کې دی چې په پرله پسې ډول د چینايي انجینرانو د مسلې په راپورته کولو سره د دغې ډلې او چین ترمنځ اړیکې خرابې کړي.