امریکايي ځواکونو د جمعې په ورځ په شام او عراق کې د ایران پاسداران انقلاب ځواکونو او د پاسداران انقلاب ځواکونو په ملاتړ د جنګېدونو وسله والو په هدفونو حملې وکړې. څلورو امریکايي چارواکو روېټرز خبري ادارې ته په منځني ختیځ کې د تازه حملو تصدیق وکړو.
تېره هفته په اردن کې په امریکايی پوځي اډه د ډرون حمله کې د دریو امریکايي ځواکونو د وژل کېدو او تر 40 پورې د نورو عسکرو د زخمي کېدو وروسته صدر جوبایډن په سیمه کې ایران سره د تړلو وسله والو خلاف د پوځي اقدماتو فېصله کړې وه.
په اردن کې په امریکايي پوځې اډه حمله د ایران په ملاتړ جنګېدونکو وسله والو کړې وه او د امریکايي چارواکو په وېنا د حملې په بدل کې صدر بایډن د ګڼ اړخیزه ګامونو اخیستلو فېصله وکړه.
د جمعې په ورځ حملې د دغه ګڼ اړخیزه ګامونو برخه بلل کېږي.
د شام سرکاري مطبوعاتو د جمعې په ورځ وویل په "امریکايي جارحیت" کې د شام په صحرايي علاقو کې او د عراق په پوله هدفونه ویشتل شوي دي چې له امله یې مرګ ژوبله شوې ده.
دوو امریکايي چارواکو وویل په منځني ختیځ کې د امریکايي ځواکونو د تازه حملو په اړه رسمي بیان به په لږ وخت کې شایع کولی شي.
روېټرز وايي که څه هم په امریکايي حملو کې د ایران دننه هدفونه نه دي ویشتل شوي خو د دې له امله به په منځني ختیځ کې د اسرایل او حماس د جنګ په سبب موجوده تاوتریخوالی نور هم زیات شي.
په شام او عراق کې د حملې نه څو ګڼتې مخکې صدر بایډن او د امریکې د دفاع وزارت جارواکو د ډېلاوېیر ریاست په ډوور پوځي مرکز کې د هغو امریکايي ځواکونو جسدونه ترلاسه کړل چې په اردن کې وژل شوي دي.