د بلوچستان صوبې د قلعه عبدالله ضلعې په پيرعليزۍ علاقه کې د عوامي نيشنل ګوند د صوبايي اسمبلۍ کانديد انجينئير زمرک په کور ډزې شوي چې پکې د ګوند پخوانی سېنېټر داؤد خان اچکزی سخت ژوبل شوی دی.
د داؤد خان اچکزي ورور سنګر خان وي او ای ډیوه ته ويلي داؤد خان دوه ډزې لګېدلی خو روغتيايي حالت ښه دی.
د زمرک په کور ډزې نن د ګل، دوشنبې په سهار څلور بجې شوي دي، د زمرک کورنۍ ویلي په موټر سائيکلو سواره وسله وال راغلي ډزې يې کړي او بيرته تښتېدلي دی.
انجينيئر زمرک د بلوچستان د صوبايي حلقې پي بی ۲۱ نه د عوامي نيشنل ګوند کانديد دی.
د سيمې نه د وي او ای ډیوه خبريال نعمت الله سرحدي وايي د ليويز ځواک چارواکو ويلي د زمرک په کور د ډزو وروستو يې علاقه په ګېره کې اخستې او د لټون عمليات يې پېل کړي دي.
ځايي کانديدان وايي سياسي خلک په علاقه کې د سختو ګواښونو سره مخ دي او انتظاميه ورته وايي چې د اجازت پرته به هيڅ قسمه انتخابي جلسې جلوسونه نه کوي.
په قلعه عبدالله کې د صوبايي کانديد په کور ډزې په داسې حال کې شوي چې د جمعې په ورځ د بلوچستان د مستونګ په سيمه کې د بلوچستان عوامي پارټۍ د کانديد سراج رئيساني په انتخابي کمپاين ځانمرګی بريد شوی او د هغه په ګډون پکې ۱۲۹ تنه وژل شوي وو.
د جمعې په ورځ په بنو کې د جمعيت علمااسلام ف ډلې په کانديد او د خېبرپښتونخوا صوبې د پخواني اعلا وزیر اکرم خان دراني په کاروان هم چاؤدنه شوې نوموړی پکې روغ وتی خو څلور کسان پکې وژل شوي وو.
له دغې وړاندې په پېښور کې د عوامي نيشنل ګوند په کانديد هارون بلور ځانمرګی بريد شوی چې پکې د نوموړي په ګډون لږ تر لږه ۲۱ تنه وژل شوي وو.
د پاکستان په دوه صوبو خېبرپښتونخوا او بلوچستان کې د بدامنۍ پېښې په داسې حال کې رامنځته شوي چې په ملک کې په ۲۵م جولايۍ عام انتخابات ټاکل شوي دي.