په باجوړه ضلع کې يو تن خپله ښځه او د ښځې خور(خينه) په ډزو وژلي دي، وژل شوې دواړه خوېندې په سکول کې استازانې وې.
د باجوړ د ځایي انتظاميې په وېنا نن د شورو، چهارشنبې په سهار دغه پېښه د ماموند تحصيل په عمري علاقه کې رامنځته شوې ده.
په سمدستي ډول ځايي خلکو ويلي د پېښې علت کورنۍ جګړه ښودل شوې او ډزې کوونکی تن نيول شوی او انتظامیې ته سپارل شوی دی.
وژل شوې خوېندې استازانې شازيه او نصرت نوميږي.
ځايي خلکو ويلي د دغه ډزې کوونکي تن سره يو بل ملګری هم ؤ خو هغه د موقعې نه په تېښته کې بريالی شوی دی.
پاکستان کې وخت په وخت کې د ښځو د وژنو پېښې رامنځته کيږي چې زياتره یې د غېرت په نوم وژنې وي.
خو د بشري حقونو سازمانونه وايي پاکستان کې په ښځو د تشدد او وژنو پېښې زياتې رامنځته کيږي خو دا پېښې ډېرې د رپوټ کېدو نه پاتې شي.
د نړيوالو کارپوهانو د يوې سروی ترمخه پاکستان په نړۍ کې د ښځو دپاره شپږم نمبر خطرناک هېواد دی.
دوه میاشتې وړاندې خپرې کړې سروی رپوټ ترمخه پاکستان کې د اقتصادي لاس رسي او توپير ترڅنګ په دغه هېواد کې ښځې د کلتوري، مذهبي او روايتي کړنو او غېرت په نوم وژنو د پېښو سره مخ دي.
پاکستان په غېر جنسي تشدد او کورنيو ناوړه کړنيو کې په پينځم نمبر هېواد شمار کړی شوی ؤ.
د بشري حقونو کمېشن (اېچ ار سي پي) د کال ۲۰۱۷م په اړوند خپل کاليز خپور کړي رپورټ کې ويلي ؤ تېر کال په پاکستان کې په ښځو د نور هر کله نه سېوا د تشدد پېښې زياتې رپوټ شوي دي، ۵۶۶۰ پېښې يواځې د کال په لمړو ۱۰ میاشتو کې ثبت شوې وې.
د رپورټ ترمخه تېر کال ۲۷۴ ښځې د غېرت په نوم وژل شوي، ۲۰۶ سره په ګډه جنسي تيری شوی، ۲۸۴۰ سره جنسي تیری شوی او په ټول ملک کې ۶۸۱ ښځې وژل شوې وې.
