د افغانستان ملي او ایمرجنګ لوبډلې د تمريناتي کېمپونو دپاره د هند چناې ښار ته تللي، چې د نړيوال او اسيا کپ دپاره تيارۍ ورکړي.
د افغانستان کرکټ بورډ عمومي رییس عزیزالله فضلي د ملي او ایمرجنګ لوبغاړو ته د روانېدو وړاندې ويلي، هیله ده چې لوبغاړي د تمریناتي کېمپ څخه ډېر څه زده کړي او له نورو لوبډلو سره د لوبو پر مهال افغانستان تر بریا ورسوئ.
هغه ويلي کرکټ بورډ خپلو ټولو لوبغاړو ته اسانتياوې برابروي چې د اسيا کپ په ايمرجنګ سياليو او راتلونکي نړيوال کپ کې غوره لوبه وکړي.
ويل شوي د کېمپ په ترڅ کې به روزونکي د لوبغاړو د فیټنس او تخنیکونو د پیاوړي کولو هڅه وکړي.
د افغان کرکټ بورډ ترمخه د افغانستان ایمرجنګ لوبډلې سره د هېواد ۲۴ کسیزه ملي لوبډله هم د یو میاشتني تمریناتي کېمپ لپاره هند ته تللې چې موخه یې د ۲۰۱۹ نړیوال کپ سیالیو ته د تمریناتو د لړۍ پیلول دي.
بورډ ويلي په هند کې به د افغانستان د ملي لوبډلې تمریناتي کمپونه پړاو په پړاو د ۲۰۱۹ م کال تر فبرورۍ میاشتې پورې روان پاتې شي.
د اسیا ایمرجنګ جام سیالۍ د روان کال د دسمبر پر ۵ مه نېټه په سری لنکا او پاکستان کې پېلېدونکې دي چې د افغانستان، هند، پاکستان، سری لنکا، هانګ کانګ، بنګله دېش، متحده عربي امارات او عمان لوبډلې پکې برخه اخلي.