واشنګټن ــــ د ملگرو ملتونو عمومي منشي انتونیو گوتیریس په افغانستان کې په ښکېلو ټولو اړخونو غږ کړی دی چې د سپمټبر په 28مه کېدونکو ولسشمریزو ټاکنو کې د افغانانو د رایې ورکولو حق باوري کړي.
نوموړي ویلي چې باید د رایې حق لرونکي ټول افغان سړي او ښځې وکړی شي چې خپلې رایې په ازادۍ سره وکاروي.
ښاغلی ګوتیریس وایي دا خبره ډېره مهمه ده ځکه چې افغانستان د یو ډیموکراټیک او ټول شموله سیسټم د جوړولو لپاره هڅې کوي.
د ملگرو ملتونو عمومي منشي یو ځل بیا ټینگار وکړ چې د انتخاباتي پروسې پر وړاندې هر ډول تاوتریخوالی، د رایې ورکولو په مرکزونو، د انتخاباتي کارمندانو او رایه ورکوونکو په شمول بریدونه د منلو وړ نه دي.
نوموړي زیاته کړه چې د ولسمشرۍ انتخاباتو په مهال د تاوتریخوالي، د ویرې یا د درغلیو لپاره هېڅ ځای نه شته.
د ملګرو ملتونو عمومي منشي په ټولو مهم ښکېلو اړخونو غږ وکړ چې د یوه سوله ییز، معتبره، شفافه او ټول شموله ټاکنو پروسې لپاره خپل رول ولوبوي او د ملګرو ملتونو دا ژمنه یې یو ځل بیا تکرار کړه چې له افغانانو سره به مرستې جاري ساتي.
د ملګرو ملتونو تر عمومي منشي وړاندې په افغانستان کې د ملګرو ملتونو ځانګړي استازي تدامیچي یماموتو هم څو ورځې وړاندې په قطر کې له طالب استازو سره د لیدو په وخت له هغوی غوښتي، چې د افغانستان د ولسمشرۍ په ټاکنو کې له تاوتریخوالي لاس واخلي.
