واشنګټن ــــ د شمالي کوریا مشر کیم جانګ اون ګواښ کړی چې بیرته به د خپلو بین البراعظمي بیلسټیک توغنديو او نورو ایټمي وسلو ازموینې پیل کړي او نړۍ ته یې خبرداری ورکړ چې ډېر ژر به نوې سټرېټیجیکې وسلې وویني.
شمالي کوریا تېره میاشت د دسمبر 31مه وروستۍ نېټه اعلان کړې وه چې که امریکا ورسره د ایټمي پروګرام پر سر خبرو ته دوام ور نه کړي او ورباندې لګولي بندیزونه وا نه خلي، نو بیرته به خپل د بیلسټیک توغندیو پروګرام پیل کړي.
خو پرون د دې هېواد مشر کیم جونګ اون د نوي کال په مراسمو کې په رسمي توګه له امریکې سره د خبرو د تم کولو په اړه څه ونه ویل او داسې ښکارېده چې لا نور هم د خبرو په تمه تر امریکایي بندیزونو لاندې اوسېدل غواړي. کیم ویلي:
"شمالي کوریا او امریکا په پېړیو پېړيو د یو بل مخالف اوسېدلي خو اوس یې مخالفت پر ځان د باور لرلو او بندیزونو تر منځ را محدود شوی دی".
کیم جانګ اون پرون د خپل ګوند د څلورورځنۍ غونډې په پای کې خپل ولس ته خبرداری ورکړ، چې لا نور هم سخت وخت ورباندې راتلونکی دی او باید لا نور هم د امریکې بندیزونه و زغمي.
پیانګ یانګ تر دې وړاندې هم د خپلو بېلسټیک توغندیو ازموینه کړې چې ویل کېږي دا توغندي دا وړتیا لري چې د امریکې هره برخه ویشتلای شي، له دې پرته شمالي کوریا د ایټمي وسلو شپږ تجربې هم کړې دي.
د وروستۍ ایټمي تجربې په اړه داسې اټکل کېږي چې د دې زور تر هغه ایټمي بم 16 چنده زیات دی چې امریکې په 1945م کال کې د دویمې نړیوالې جګړې په مهال د جاپان پر هیروشیما ښار غورځولی وو او دا ښار یې په بشپړه توګه تباه کړی وو.
د شمالي کوریا د سرکاري خبري ایجنسۍ کې سي این اې د خبر له مخې، کیم جانګ اون د واکمن ګوند له مشرانو سره د سلا مشورو په مهال ویلي، نور د امریکې د بندیزونو پروا نه کوي او نه هم ورسره دا ګنجایش پاته دی چې له امریکې سره یواړخیزې ژمنې وپالي.
