د پاکستان د بهرنيو چارو وزیر د ايراني صدر سره ليدلي او ويلي يې دي پاکستان به خپله خاوره د بل چا پرضد کارېدو ته نه پرېږدي او نه به پاکستان په سيمه کې د بلې کومې جګړې برخه جوړيږي.
د پاکستان د بهرنيو چارو وزارت ويلي شاه محمود قرېشي په تهران کې د ايراني صدر حسن روحاني سره ليدلي د امریکا او په سيمه کې په روانو حالاتو يې ورسره خبرې کړي دي.
قرېشي د ايران د بهرنيو چارو وزير جواد ظريف سره هم ليدلي دي.
د امريکې د لاسه په بغداد کې د ايران د قدس ځواک د مشر قاسم سليماني د وژنې وروسته د امریکا او ايران اړيکې نورې ترينګلې شوې او له دغې وروسته ايران په عراق کې د امریکايي پوځ د مېشتې په دوه مرکزونو ميزايلې داغلې وې.
د قاسم سليماني د وژنې وروسته امریکا د پاکستان سره رابطه کړې وه.
د پاکستان وزیراعظم عمران خان ويلي ؤ چې د بهرنيو چارو وزير شاه محمود قرېشي ته يې د امریکا، سعودي عرب او ايران د بهرنيو چارو د وزيرانو سره د ليدو ويلي دي.
نوموړي ويلي ؤ پاکستان د سولې کردار ته تيار دی خو د بلې کومې جګړې برخه به نه جوړيږي.
د پاکستان د بهرنيو چارو وزارت ويلي شاه محمود قرېشي د خپل ايراني سيال سره په ليدنه کې د امریکا او ايران ترمنځ د تريخوالي او په سيمه کې د امن سره په دوه اړخيزه اړیکو خبرې اترې کړي دي.
شاه محمود قرېشي ويلي، په منځني ختيځ کې د تاؤ تریخوالي قابو کولو، او د روانو حالاتو په پرامنه ډول د سموولو دپاره فريقېنو ته د زغم او خبرو لاره خپلول پکار دي.
هغه زياته کړې سيمه د بې ثباتۍ نه ژغورولو او شخړې کمولو دپاره به ټولو ښکېلو فريقېنو ته جدي، سنجيده هڅې کول وي.
د پاکستان د بهرنيو چارو وزارت ويلي د ايران د بهرنیو چارو وزير جواد ظريف په سيمه کې د امن دپاره د پاکستان د وزيراعظم عمران خان هڅې ستايلي دي.
