کرونا وايرس د امریکا سپينې ماڼۍ ته رسېدلي او د سپينې ماڼۍ په دوه کار کوونکو کې د کرونا وايرس پخلی شوی دی.
صدر ټرمپ د جمعې په ورځ پخلی کړی چې د مرستيال صدر مايک پنس پرېس سيکرټري او د ټرمپ د همکار سټېفن ميلر د ښځې د کرونا وايرس ټېست مثبت راغلی دی.
د سپينې ماڼۍ وياند ويلي په مايک پنس کې د کرونا وايرس پخلی نه دی شوی او هغه به د ګل/ دوشنبې په ورځ بيرته سپينې ماڼۍ ته ستنيږي.
د سپينې ماڼۍ وياند ډېوين اوملي د اتوار/ شنبې په ورځ ويلي مرستیال صدر مايک پنس به د سپينې ماڼۍ د ډاکټرانو په لار ښوونه عمل کوي او هغه قرنطين شوی نه دی.
په سپينه ماڼۍ کې د کرونا وايرس پرضد عمليات کوونکی مشر پوهاند ډاکټر انتهوني فاؤچي ځان په خپله قرنطين کړی او د هغه د کرونا وايرس ټېسټ منفي راغلی دی.
په امريکا کې تراوسه پورې ۱۳لکه خلک کرونا وايرس اغېزمن کړي او د ۸۰ زرو نه زيات يې مړه کړي دي.
د امریکا نيويارک ښار کرونا وايرس تر ټولو زيات ځپلی دی.
د شمېرو ترمخه په نيویارک کې د اتوار د ورځې پورې ۲۶زره ۶۷۰ کسان د کرونا وايرس نه مړه شوي د اغېزمنو شمېره درې لکه ۳۵ زره ۳۹۵ ته رسېدلې ده.
په ګرده نړۍ کې د کرونا وايرس نه د اغېزمنو شمېره د څلور ميلينو نه اوښتې او د امریکا د جونز هوپکنز پوهنتون د شمېرو ترمخه د دوه لکه او ۸۰زرو نه زيات خلک يې مړه کړي دي.