لاس رسیدونکی لینک

Breaking News

په پاکستان کې د جولای له 20مې د پولیو په ضد ماشومانو ته د څاڅکو ورکولو کمپېن پیلېږي


واشنګټن ــــ په روغتیایي چارو کې د پاکستان د وزیراعظم ځانګړی مرستیال ډاکټر ظفر مرزا وایي، د کرونا وایرس له کبله ځنډېدلی د پولیو یا ګوزڼ د ناروغۍ په ضد ماشومانو ته د څاڅکو ورکولو پینځه ورځنی کمپېن به د جولای له 20مې پیل شي.

دا کمپېن په داسې وخت کې پیلېږي چې د بلوچستان په کلا عبدالله ضلع کې پرون د شنبې- خالي په ورځ بیا د یوې اوولس میاشتنۍ ماشومې په بدن کې د پولیو وایرس موندل شوي دي. چارواکي وایي دې ماشومې ته د کورنۍ د انکار له کبله یو ځل هم څاڅکي نه وو ورکړل شوي.

ډاکټر ظفر مرزا وایي دغه کمپېن به د هېواد په ځانګړو سیمو کې کېږي، چې وایي د وېکسینېشن ډلې به یې د کرونا وایرس د مخنیوي پر احتیاطي تدابیر کلک عمل کوي.

په پاکستان کې په تېرو څو کلونو کې ماشومانو ته د پولیو ضد څاڅکو پر ورکوونکو روغتیایي ډلو په وار- وار وسلوال بریدونه شوي چې ډېر پکې وژل شوي او ټپیان شوي دي. حکومت وایي د دې کمپېن په مهال یې کلک امنیتي تدابیر هم نیولي دي.

د بلوچستان د پولیو د مخنیوي د صوبایي څانګې مشر ډاکټر افتاب کاکړ د جون پر ۲۶مه وي او اې ډیوه ته ویلي وو، د کرونا وایرس له کبله په پاکستان کې تر 40 میلینه زیات ماشومان د پولیو ضد کمپاین له څاڅکو محرومه شوي دي.

د ډاکټر ظفر مرزا په وینا ټاکل شوې چې دا کمپېن په اټک، جنوبي وزیرستان، کوټه، فیصل اباد او د کراچۍ ښار په ځینو برخو کې تر سره شي چې وایي په دې کې به اته لکه ماشومانو ته د ګوزڼ له ناروغۍ د ژغورنې څاڅکي ورکول کېږي.

سږ کال تر اوسه به ټول پاکستان کې د پولیو 60 کېسونه رپوټ شوي دي چې په هغوی کې 21 په پښتونخوا، 20 په سیند، 15 په بلوچستان او څلور په پنجاب صوبه کې رپوټ شوې دي.

XS
SM
MD
LG