د قبايلي ضلعې شمالي وزيرستان په ميرعلي بازار کې د نامالومو کسانو په ډزو کې څلور ملکان وژل شوي چې تعلق يې د خېسور علي خيل علاقې سره دی.
دا پېښه نن د ګل/ دوشنبې په ورځ شوې ده.
د ميرعلي پوليس تاڼې پېښه تاييد کړې چې په ډزو کې د خېسور علي خېل علاقې ميرسادی، رضا، عابد رحمان او ملک عمر خان وژل شوي دي.
پوليس ويلي د پېښې وروسته يې علاقه په ګېره کې اخستې او د لټون عمليات يې پېل کړي دي.
د وژل شوؤ کسانو په اړه نور تفصيل مخې ته نه دی راغلی او نه د بريد زمه واري چا منلې ده.
د پښتون ژغورنې غورځنګ د شمالي وزيرستان فعال عيد رحمان وايي، په علاقه کې دغه رنګ پېښې پرله پسې کيږي د علاقې خلک يې اندېښمن کړي ځکه چې د هغه په خبره دا پېښې به اول د شپې کېدې او اوس په رڼا ورځ شورو شوې.
بل لور ته د دته خېل تحصيل په ديګان کې د عبدالقدوس نومې تن د وژنې وروسته پېل کړی شوې احتجاجي ناسته په څلورم ورځ ځنډول شوې ده.
د وژل شوي تن کورنۍ ويلي عبدالقدوس د يوې کوېژدن د دستورې نه بيرته کور ته روان ؤ او تور یې لګولی پوځ پرې ډزې کړې وې.
پوځ دغه تور ته کوم ځواب نه دی ويلي خو د سيمې نه يو امنيتي چارواکي د نوم ښکاره کولو په شرط ويلي پوځ بې ګناه وژنې نه کوي.
پوليس تاييد کړې چې د يادې کورنۍ لخوا ورته خواست ترلاسه شوی او کورنۍ پکې د پوځ د ځايي مشرانو پرضد د مقدمې درج کولو غوښتنه کړې ده.
پوليس ويلي د پوځ په کار کې کار نه لري او د وژل شوي تن کورنۍ ویلي اوس به د مقدمې درج کولو دپاره عدالت ته ځي.
په علاقه کې د بدامنۍ په پېښو کېدو د سيمې نه د خېبرپښتونخوا اسمبلۍ غړي ميرکلام وزير هم اندېښنې څرګندې کړي او ويلي يې دي دوی بيا بيا د رياست نه په علاقه کې د امنيت غوښتنه کوي خو رياست د دوی غږ نه اوري.
