لاس رسیدونکی لینک

Breaking News

ایمل ولي: حکومت دې د اسد اڅکزي د وژنې د پلټنو لپاره عدالتي کمېشن جوړ کړي


کوټه ـــ د عوامي نېشنل ګوند د پښتونخوا صوبې ایالتي مشر ایمل ولي خان د شنبې- خالي په ورځ ماښام د بلوچستان له وزیراعلی سره ګډې خبري غونډې ته وویل، د اسد خان اڅکزي د پېښې د پلټنو لپاره دې د بلوچستان حکومت عدالتي کمېشن جوړ کړي:

"د اسد خان د ټولې پېښې د پلټنو لپاره د عوامي نېشنل ګوند يوه غوښتنه دا ده چې د د بلوچستان هايکورټ په کچه دې کمېشن جوړ شي".

د ايمل ولي د خبرو په جواب کې د بلوچستان وزیراعلا جام کمال وويل، حکومت د اسد اڅکزي د موندلو پوره پوره هڅې وکړې خو بريالی نه شو. جام کمال زياته کړه د اسد د پيښې به په ښه توګه پلټنې کوي:

"د دې پېښې د هراړخيزو پلټنو لپاره تحقيقات کول پکار دي، که د جوډيشل کميشن پر لوري تلل وو هغه به هم وکړو".

د اسد اڅکزي مړی د کوټې له نوحصار سيمې موندل شوی. د نوهسار د پوليس تاڼې محرر علي اکبر ډيوه ته وويل د اېرپورټ تاڼې پوليسو يو تن اغوا کار نيولی او هغه ورته دا ښوولې چې د اسد اڅکزي مړی يې د نوحصار په عيسی کلا سيمه کې په يو کوهي کې غورځولی.

علي اکبر وایي پوليس چې د عدالت د مجسټرېټ په موجودګي کې هلته ورغلو نو له کوهي يې د يو تن مړی را وايست چې په ګوليو ویشتل شوی وو:

"د اسد اڅکزي ورور اېډوکېټ امجد خان د اسد مړی پر جامو و پېژندو چې دا اسد دی. د پوليس محرر زياته کړه، "اسد خان پینځه مياشتې وړاندې وژل شوی او جسد یې خراب شوی وو ځکه يې پېژندګلوي هم نه کېده".

د اسد اڅکزي د وژنې په ضد پرون د کوټې پر منان چوک د پښتون سټوډنټس فېډريشن او عوامي نېشنل ګوند غړو احټجاج هم وکړ. احتجاج کوونکو چوک د ټريفک لپاره احتجاجاً بند کړی، ټایرونه یې سوځولي وو او د امنيتي ادارو پر ضد یې شعارونه ورکړل.

په احتجاج کې شريک د عوامي نېشنل ګوند غړي خليل اغا وي او اې ډیوه ته وویل، اسد يې د تېر کال پر 25م ستمبر اغوا کړی وو، خو پولیسو نن حال راکړ چې اسد وژل شوی دی.

په احتجاج کې شريک د اې اين پي غړي منظور کاکړ وایي "اسد اڅکزي يو قسم ذاتي دښمني نه درلوده، هغه د پښتنو لپاره ږغ پورته کړی وو ځکه ووژل شو:

"اسد د خپل وطن د خپل قوم د خپل عوام د حقوقو خبره کوله، د لر او بر افغان خبره يې کوله او د باچاخان بابا پر لاره روان وو".

د جميعت علما اسلام کوټې پخواني مشر ولي محمد ترابي هم د کوټې په احتجاج کې شرکت وکړ، هغه وي او اې ډيوه ته وويل "د داسي پېښو مخنيوی د حکومت ذمه واري ده:

"يا به حکومت له خپله ځانه دا پور اړوي يا دې قاتلان معلوم کړي ګني دی په خپله د دې قاتل ثابتېدی شي".

عوامي نېشنل ګوند نن په بلوچستان کې د خپل ایالتي ویاند اسد خان اڅکزي د وژنې پر ضد په بلوچستان ايالت کې کاربنديز او اووه ورځنی ماتم او د ګوند پر دفترونو د تورو جنډو لګولو او په مرکز کې درې ورځنی ماتم اعلان کړی.

  • 16x9 Image

    حفیظ الله شېرانی

    حفیظ الله ستوری شېرانی په بلوچستان کې د وي.او.اې ډیوه د خبریال په توګه کار کوي. هغه له بلوچستان پوهنتون څخه په جرنلزم او پښتو ادبیاتو کې ماسټرۍ کړې دي او له تېرو اوو کلونو راهیسې د جرنلزم په میدان کې کار کوي. شپږ کاله یې د پاکستان له (ډان) ټیلیویژن سره د خبریال په توګه کار کړی او په بېلابېلو ورځپاڼو کې یې کالمونه هم لیکلي دي. په بلوچستان کې د ډیوه رېډیو او ټیلویژن لپاره د ملټي مېډیا په برخه کې پر بېلابېلو سیاسي، کلتوري او ټولنیزو موضوعاتو رپوټونه جوړوي.

     

XS
SM
MD
LG