لاس رسیدونکی لینک

Breaking News

امریکا او جنوبي کوریا د شمالي کوریا له خوا د امنیتي ګواښونو په اړه خبرې کړې


د امریکا خارجه سېکتر انتوني بلینکن او د جنوبي کوریا خارجه وزیر چونګ ایو ینګ کرونایي روغبړ کوي

واشنګټن ـــ د امریکا او جنوبي کوریا لوړپوړو چارواکو تر منځ د جنوبي کوریا په سر ښار سېول کې د شمالي کوریا لخوا د امنیتي ګواښونو په سر خبرې اترې پای ته رسېدلې. سره د دې چې واشنګټن د پیانګ یانګ سره د خبرو اترو تازه هڅې پېل کړي، د کیم جان اون حکومت ویلي دوی خبرې اترې نه کوي.

د امریکا خارجه سېکتر انتوني بلېنکن د دفاع سېکتر لایډ آسټن سره په ګډه د جنوبي کوریا په سرښار کې د دغه هیواد د دفاع وزیر، د خارجه چارو وزیر چونګ ایو ینګ او د قامي دفاع وزیر سو ووک سره د خبرو اترو په وخت ویلي، واشنګټن په دغه سیمه کې د شمالي کوریا لخوا پېښو ګواښونو په اړه د خپلو اتحادیانو سره همکاري کوي.

ښاغلي بلېنکن ویلي: "مونږ د شمالي کوریا د ایټمي وسلو نه پاکولو، امریکا او اتحادیانو ته د ورپېښو دهړکو کمولو او د کوریايي اولس چې پکې د شمالي کوریا خلک هم راځي د هغو په ژوند کې ښه والي راوستو ته ژمن یو".

د جنوبي کوریا د دفاع وزیر سو ووک په دغه مهال ویلي شمالي کوریا دریو واړو هیوادونو ته ګواښونه لري. هغه وايي، مونږ موافق یو چې د جنوبي کوریا، امریکا او جاپان تر منځ درې اړخیزه امنیتي همکاري د شمال ختیځې اېشیا د خوندیتوب لپاره مهمه ده.

د بایډن انتظامیې ویلي دوی هڅه کړې چې د شمالی کوریا خبرې اترې بیرته پېل کړي او په ملګرو ملتونو کې د امریکا د مِشن او په نورو لارو دوی ته د رسېدو هڅې کوي خو ورته د شمالي کوریا لخوا کوم ځواب نه دی ترلاسه شوی.

پیانګ یانګ هم د زیارت- پنجشنبې په ورځ دغه خبره منلې، خو د شمالي کوریا نایب خارجه وزیرې چو سن هويي لخوا په سرکاري مېډیا خپاره شوي بیان کې ویل شوي، حکومت به تر هغې د امریکا سره خبرو اترو ته نه کښېني تر څو چې امریکا د شمالي کوریا په اړه خپله سخته پالیسي نه وي بدله کړې.‌

په سېول کې د جزیره نما کوریا په اړه یوې څیړنیزې ادارې څېړنکار هین جن کوو وايي کېدای شي پیانګ یانګ دا اشاره ورکوي چې دوی د لوړې کچې رابطې غواړي لکه څنګه چې دوی د تېر صدر ټرمپ په انتظامیه کې ترلاسه کړې وې.‌

دی وايي "دوی خپل ځان درنول او سره د دې د موجوده بندیزونو کې لږه نرمي غواړي، کومو چې د شمالي کوریا اقتصاد اغېزمن کړی په خاصه توګه د وبا خورېدو وروسته".

خو سره د دې هر څه هین جن کوو وایي د بلینکن او آسټن دا تازه سفرونه د امریکا او اتحادیانو لپاره یو بدلېدونکی حالت دی.

د جنوبي کوریا سرښار د بایډن د انتظامې د کابینې د لوړپوړو غړو دویم پړاو وو.‌ روانه اونۍ یې په جاپان کې د جاپاني چارواکو سره هم خبرې اترې کړي.

د جنوبي کوریا نه به د امریکا د دفاع سېکتر آسټن د امنیتي خبرو اترو لپاره د جمعې په ورځ هند ته رسیږي، خو بلینکن به الاسکا ته سفر کوي او هلته به هغه د چین سترو خارجه چارواکو سره ویني.

بلېنکن ویلي، د پیانګ یانګ نیوکلیايي وسلو نه پاکولو یا بې وسلې کولو کې چین مهم رول لوبولی شي.

XS
SM
MD
LG