واشنګټن - تمه ده فضا ته د لېږل شوي ستر چینايي راکټ پاتې شوني به د مې په اتمه نېټه بېرته د ځمکې اتوموسفیر ته ننوځي او چینايي چارواکي وايي، داسې نه ښکاري چې ویجاړی به رامنځ ته کړي.
دغه خبره د چین د بهرنیو چارو د وزارت ویاند وانګ وینبین د جمعې په ورځ کړې.
د چین لخوا دغه راکټ چې ۲۱۰۰۰ کیلوګرامه وزن لري، د اپرېل په ۲۹ نېټه له هېنېن ټاپو څخه توغول شوی وو.
ټاکل شوې وه چې له خپل فضايي ماموریت څخه وروسته بېرته په سمندر کې ګوز شي خو معلومه نه ده چې ټوټې به یې چېرې غورځي.
د امریکا فضايي مرکز ددغه راکټ ځای په نخښه کړی خو وايي تر هغو به دا معلومه نشي چې دا راکټ چېرې لګېږي تر څو د ځمکې اتوموسفیر ته داخل نشي.
