لاس رسیدونکی لینک

Breaking News

د خوګه خېلو د احتجاج له امله د تورخم پوله په درېمه ورځ هم په عارضي توګه تړلې پرته وه


د خېبرپښتونخوا د خېبر ضلعې د شینوارو خوګه خېل قوم له اړخه د روان احتجاج له امله په درېمه ورځ هم د تورخم پوله په عارضي توګه تړلې وه.

خوګه خېل قوم درې ورځې وړاندې احتجاج پېل کړی او غوښتنې کوي چې په تورخم کې د قوم په اجتماعي ملکيتي ځمکه کوم نوی ټرمېنل جوړيږي دوی ته دې په هغې په مالي ګټو او نوکريو کې برخه ورکړی شي او د دوی کومه نوره ځمکه چې په کار راوستل کيږي د هغې قيمت دې ورته هم ورکړی شي.

د حکومتي چارواکو او قوم ترمنځ پرون خبرې شوي خو کومه نتيجه يې مخې ته نه وه راغلې او نن هم پکې د دې خبر خپرېدو پورې کوم پرمختګ نه دی شوی.

که څه هم د تورخم پوله په رسمي توګه يا حکومتي کچه نه ده تړل شوې خو سوداګر وايي د دغه عارضي بندېز له امله ورته هم ډېر تاوان اوړي.

د افغانستان سره تجارت کوونکی يو پخوانی سوداګر ضياالحق سرحدي وايي د داسې احتجاجونو ټول تاوان سوداګرو ته اوړي.

وي او اې ډيوه سره په خبرو کې هغه وويل د پاکستان نه چې افغانستان ته کوم مالونه ځي هغه د وړاندې په کمېدو دي او دا ډول د پولې بندېز يې نور کموي.

هغه وويل د دواړو هېوادونو ترمنځ د سوداګرۍ حجم پينځه اربه ډالره پکار دی خو هغه دوه نيم اربه ډالره ته راکم شوی او اوس د يو ارب ډالرو نه هم کم شوی دی.

د افغانستان او پاکستان سوداګر د اوږدې مودې نه دغه غوښتنه تکراروي چې دواړه هېوادونه دې سوداګري د سیاست نه لرې وساتي او پولې دې په يو حالت کې بندې نه شي چې سوداګري روانه وي.

د سرحد چېمبر اف کامرس اېنډ انډسټري پخوانی مشر زاهدالله شينواري وايي، کله چې په تجارت کې پوله بنديږي نو هغه مارکيټ بیا د لاسه ووځي.

د پاکستان چې د افغانستان سره کوم تجارت دې په هغې کې د مختلفو وجوهاتو له امله پوله کله د يو او کله د بل لوري بنده شي او سوداګري ودريږي د کوم له امله چې زمونږ سره متعلقه کوم خريدار دي هغوی بيا بلې لارې ته لاړ شي او د بل ځای نه سوداګانې کوي.

پاکستان په کال 2015 او 2016 کې افغانستان سره د کال په سر د تجارت حجم د دوه نيم اربه ډالرو پورې رسولی وو او د کال 2020 پورې يې دا هدف پينځه اربه ډالرو ته رسول ټاکلي وو.

خو د دواړو هېوادونو ترمنځ د تاو تريخوالي له امله چې سوداګري تل اغېزمنه شوې دا وخت د دواړو هېوادونو ترمنځ د تجارت حجم د يو ارب ډالر نه هم کم شوی دی او دواړو غاړو ته سوداګر وايي سخت يې پرېشانه کړي دي.

XS
SM
MD
LG