لاس رسیدونکی لینک

Breaking News

افغان چارواکي وایي په تېره یوه اوونۍ کې 1,500 طالبانو ته مرګ ژوبله اوښتې


واشنګټن ـــ په داسې حال کې چې د افغان چارواکو په وینا په بېلابېلو ولایتونو کې یې د طالبانو په ضد جګړه لا روانه ده، د افغانستان ملي امنیت اداره وایي په تېره یوه اوونۍ کې 1500 طالبان په جګړو کې وژل شوي او ټپیان شوي خو طالبانو دا دعوه رد کړې ده.

د افغانستان د استخباراتي ادارې ملي امنیت مشر احمد ضیا سراج وایي، تېره اوونۍ د وسلوالو طالبانو لپاره ډېره خونړۍ وه او وایي په بېلابېلو سیمو کې هغوی د افغان ځواکونو له خوا تر فشار لاندې او ځپل شوي دي.

احمد ضیا سراج د شنبې- خالي په ورځ په کابل کې یوې ګډې خبري غونډې ته په وینا کې وویل،‌ چې په تېره یوه اوونۍ کې سلګونو طالبانو ته مرګ ژوبله اوښتې ده:

"تېره اوونۍ د دښمن لپاره یوه خونړۍ اوونۍ وه،‌ د افغانستان په مختلفو برخو کې د دوی [طالبانو] شاوخوا 1,500 تنه وژل شوي او ټپیان شوي‌ دي، دغې مرګ ژوبلې د طالبانو تر منځ‌ هم ستونځې پیدا کړې دي ځکه چې دوی له خپلو وسلوالو په جګړه کې پر ځای ګټه نه واخیستله".

وسلوالو طالبانو تر اوسه په رسمي توګه د افغان چارواکو د دې دعوې په اړه بیان نه دی خپور کړی، خو بي بي سي د دې ډلې د ویاند ذبیح الله مجاهد له خولې په تېره اوونۍ کې د دوی د وسلوالو د وژل کېدو او ټپي کېدو دا شمېر "خیالي" بللی دی.

د افغانستان د استخباراتي ادارې مشر احمد ضیاء سراج دعوه وکړه چې طالبانو له دې کبله چې په جګړه کې له ماتې سره مخ شول، پخپلو لیکو کې یې کم عمره هلکان د جګړې لپاره وګومارل:

"دوی په جګړه کې د کم عمره هلکانو په ګومارلو پیل وکړ، په زور او جبر هغوی راولي وسلې ورکوي او د جګړو سنګرونو ته یې لېږي".

خو د طالبانو ویاند پخپلو لیکو کې د کم عمره هلکانو د جنګولو دعوه رد کړې ده.

د افغانستان د ملي امنیت سلاکار حمدالله محب په خبري غونډه کې وویل، حکومت یې د هېواد د شخړې پر سیاسي او سوله ییز حل باور لري خو وایي طالبان د سولې پر ځای جګړې ته دوام ورکول غواړي:

"موږ د سولې طرفدار خلک یو، موږ سوله او مذاکره غواړو، جنګ پلوه او هغه خلک چې فکر کوي د جنګ له لارې دا ګټي هغه طالب دی، طالب مذاکرې ته تر اوسه سهي نه دی حاضر شوی، ځکه دوی په دې باور نه دي چې مذاکره د دوی لپاره د حل لاره ده، دوی یواځې جنګ پېژني".

د افغانستان د دفاع وزارت پرون ویلي،‌ چې په تېرو څلرویشت ګنټو کې د دې هېواد په اتلسو ولایتونو کې افغان ځواکونو د طالبانو د بریدونو په جواب کې 210 وسلوال وژلي دي.

ملګرو ملتونو تېره میاشت په رپوټ کې ویلي وو، چې د روان 2021م کال په لومړیو درو میاشتو کې 1,800 عام افغانان د طالبانو او افغان ځواکونو تر منځ په جګړو کې وژل شوي او ټپیان شوي‌ دي.

XS
SM
MD
LG