کوټه/ کراچۍ —
د بلوچستان صوبې په سر ښار کوټه کې چاودنه وشوه، پولیس وايي د لومړو مالوماتو ترمخه په چاودنه کې پینځه تنه د پولیس سرتیري ټپيان شوي دي.
دا چاودنه نن د ګل/ دوشنبې په ورځ (18 اکتوبر) مازيګر د کوټې په سریاب روډ د بلوچستان پوهنتون د دروازې مخې ته وشوه، چې په سمدستي توګه يې نوعيت نه دی مالوم شوی.
خو چارواکي وایي چاودنه د پولیس ځواک ټرک ته نزدې شوې ده.
پوليس وايي نور مالومات راټولولی شي.
چاودنه په داسې حال کې شوې چې د پوهنتون مخې ته د بلوچ يکجهتۍ په نوم کونسل احتجاج روان وو، دغه احتجاج د هوشاب په سيمه کې د دوه ماشومانو د وژنې پرضد روان وو.
د چارواکو په وېنا د چاودنې ټپیان د کوټې سول روغتون ته لېږدول کيږي.
بل لور ته د ښار په روغتونونو کې بیړني حالت اعلان شوي دي.
د پېښې په اړه درسره نور مالومات شريکوو، ډيوه سره پاتې شئ