اېسوشیټډ پرس - د ملګرو ملتونو امنیت شورا فېصله کړې چې د یوکرېن د جنګ په حواله به د ګل/دوشنبې په ورځ د ملګرو ملتونو عمومي اسمبلې یوه بېړنۍ غونډه جوړیږي چې دې اسمبلې کې ۱۹۳ غړي شامل دي.
د اتوار/یکشنبې په ورځ چې د امنیت شورا ناسته درلوده، په هغه کې یوولسو ملکونو د عمومي اسمبلې د بېړنۍ غونډې د جوړېدو په حق کې رایه ورکړه، روس یې مخالفت وکړ، او چین، هندوستان او متحده عربي اماراتو د ووټ ورکولو پرهېز وکړ.
د جمعې په ورځ هم چې د ملګرو ملتونو د امنیت شورا غونډه جوړه شوې وه، په دې قرارداد باندې چې یوکرېن باندې د روس حملې فوري ختمې شي او روس دې خپل ځواکونه پر شا کړي، روس هغه قرارداد وېټو کړ او قرارداد ناکامه شو. دا ځل د یوکرېن په اړه بحث عمومي اسمبلې ته پېش کیږي. د ۱۹۵۰ کال د یو پخواني قرارداد لاندې، که چېرته امنیت شورا د اختلافونو له سببه اقدام ونشي کړی، نو عمومي اسمبلې سره د بېړنیو جلسو د جوړولو اختیار شته.
د ملګرو ملتونو امنیت شورا پنځه دایمي غړي لري چې د نړۍ ستر طاقتونه ګڼل کیږي او هر یو یې د وېټو یا د یو قرار داد د رد کولو حق لري. دا پنځه طاقتونه، امریکا، روس، چین، فرانس او برطانیا دي. روس د همدې اصولو په بنیاد، د جمعې په ورځ پېش شوی قرارداد په امنیت شورا کې وېټو کړی و.
په یوکرېن کې جنګ جاري دی، خو روس او یوکرين په دې راضي شوي دي چې د بېلاروس په سرحدي سیمه کې به مذاکرات کوي. د یوکرین خارجه وزیر دمیترو کولیبا د اتوار/یکشنبې په ورځ د دې خبرې تصدیق وکړ چې د یوکرین یو مذاکراتي پلاوی به د بېلاروس په سرحد کې د روس چارواکو سره ملاقات وکړي.
بل اړخ ته صدر پوټین خپل اېټمي ځواک ته د آماده باش هدایت جاري کړی دی.
د صدر پوټین دا حکم په دې معنا دی چې پوټین غواړي خپل پوځ د اېټمي بمونو استعمال ته آماده وساتي چې هسې نه د مغربي ملکونو سره یې لانجه زور واخلي او په جوهري جګړې بدله شي.
یورپي ملکونو د روس په ضد د اضافي پابندیو د اعلان لړۍ جاري ساتلې ده. فرانس د اتوار/یکشنبې په ورځ خپلو شهریانو ته خبرداری ورکړ چې که په روس کې دي، نو په فوري توګه دې له هغه ځایه راووځي.
