واشنګټن ــــ روس وایي له اوکراین سره یې د سولې په خبرو کې د پام وړ پرمختګ نه دی شوی، بل لور ته اوکراین ولسمشر له جوبایډن سره د امریکې پر دفاعي او بشري مرستو او همدارنګه پر روس د نورو بندیزونو په اړه خبرې کړې دي.
د امریکې ولسمشر جوبایډن له خپل اوکرایني سیال ولادیمیر زلنسکي سره د شورو- چارشنبې په ورځ شاوخوا یوه ګنټه خبرې وکړې او له اوکراین سره د امریکې او د خپلو اتحادیانو او ملګرو پر پوځي، اقتصادي او بشري مرستو او په روس باندې د نورو بندیزونو په اړه یې بحث وکړ.
سپینې ماڼۍ په دې اړه په خپاره کړي بیان کې ویلي، دواړه مشران پر دې وږغېدل چې امریکا څنګه د امنیتي مرستو په برخه کې د اوکراین د غوښتنو په تر سره کولو باندې کار کوي.
ولسمشر جوبایډن ولادیمیر زلنسکي ته ویلي، امریکا اراده لري چې د اوکراین حکومت ته 500 میلینه ډالر د مخامخ بجټ د مرستې په توګه ورکړي.
که څه هم په ترکي کې د اوکراین او روس تر منځ په خبرو کې د پام وړ پرمختګ نه دی شوی خو ماسکو وایي په اوکراین کې د جګړې د ختمېدو په خاطر د سولې د خبرو هرکلی کوي.
د کریملین ویاند دیمیتري پیسکوف د شورو- چارشنبې په ورځ خبري غونډې ته ومنل چې وایي اوکراین ورته په استنبول کې د خبرو په پیل کې خپلې غوښتنې په لیکلې بڼه وړاندې کړې دي.
د اوکرایني صدر د دفتر یو مرستیال وایي، د نهې- سه شنبې په مذاکراتو کې دواړو اړخونو اوکراین ته د نړیوال امنیتي ضمانت د ورکولو په ګډون د ډزبندۍ پر ممکنه شرطونو خبرې وکړې.
د اوکراین چارواکو پرون رسنیو ته وویل، روس خپله هغه ژمنه ماته کړې چې خپل پوځي عملیات به ځنډوي او وایي د روس پوځ د اوکراین د پلازمېنې کییف او شمالي ښار چرنیهیف په شاوخوا سیمو د توغندیو بریدونو ته دوام ورکړی دی.
د کییف د پوځي ادارې مشر الیکزانډر پاولیوک د چارشنبې- شورو په ورځ وویل د پلازمېنې په شاوخوا کې د بوچا، بروواري او ویشورود په سیمو کې د استوګنې پر سیمو او ملکي تاسیساتو د روسي پوځ 30 توغندي لګېدلي دي.
د اوکراین مرستیاله وزیراعظمه ایرینا ویرشچوک وایي، روسي ځواکونه باید د چیرنوبیل د ایټمي پلانټ له سیمې ووځي ځکه اوکرایني ځواکونو خبرداری ورکړی چې هلته د چاودېدونکو موادو د چاودنې خطر دی.
ایرینا ویرشچوک په خپل تازه پیغام کې د ملګرو ملتونو له امنیت شورا غوښتي چې سمدستي دې د چیرنوبیل د سیمې د غیر پوځي کولو لپاره اقدام وکړي او یو ځانګړی پلاوی دې وګوماري چې د پخوانۍ ایټمي غمیزې د بیا تکرارېدو مخه ونیسي.
رویټرز خبري ایجنسۍ وایي ملګرو ملتونو د مارچ په ۳۰ مه د بشري حقونو درې کارپوهان وګومارل چې په اوکراین کې د ممکنه جنګي جرمونو او نورو سرغړونو په اړه پلټنه وکړي.
په یوه بیان کې ویل شوي، دغه خپلواکه کمېټه دنده لري چې د روسي فډرېشن لخوا د اوکراین په وړاندې د تېري په حال کې د بشري حقونو ټولې ادعا شوې سرغړونې او له نړیوال بشردوستانه قانونه سرغړونه او اړوند جرمونه وڅېړي.
د اوکراین ولسمشر ولادیمیر زیلینسکي له نړیوالو غوښتي له اوکراین سره د ملاتړ لپاره دې په راتلونکې نړیواله غونډه کې ګډون وکړي، چې هدف یې د اوکراین د جنګ ځپلو خلکو لپاره فنډ راټولول دي.
د روس د دفاع مرستیال وزیر الکزنډر فومین وايي، هېواد به یې د سولې په خبرو کې د دوه اړخیز باور د ټینګولو په خاطر هڅه وکړي چې په اوکراین کې خپل پوځي عملیات څو برابره راکم کړي.
