د ملګرو ملتونو امنيتي شورا [سيکيورټي کونسل] د زیارت/ پنجشنبې په ورځ د افغانانو سره په زلزله د خواخوږۍ څرګندونه کړې او په طالب چارواکو يې په ښځو د بندېزونو د لرې کولو او په هېواد کې د ثبات دپاره فشار دومداره ساتلی دی.
د البانيه سفير فېريټ هوکسا د 15 کسيزې شورا د نهه غړو په استازيتوب خبريالانو سره په خبرو کې ویلي،
"مونږ د طالبانو څخه غوښتنه کوو چې په سمدستي توګه هغه پاليسيانې او کړنې بيرته واخلي کومو چې د بشري حقونو او د افغان ښځو او جينکو بنيادي ازادي محدوده کړې، او کومې چې بشري، اقتصادي، د بشري حقونو او ټولنيز بحران سېوا کوي او په افغانستان کې د تل پاتې سولې او ثبات هدف کمزوری کوي".
د طالبانو حکومت په 23 مارچ د هلکانو او جينکو دپاره د ثانوي تعلیم دپاره سکولونه پرانستي خو لا چې درسونه پېل شوي نه وو، د طالبانو حکومت امر کړی وو چې د شپږم ټولګي نه بره جينکۍ دې بیرته کورونو ته ولېږل شي.
او د طالبانو د تعلیم وزارت ويلي وو، "کله چې په دې اړه له شريعت او افغاني دود او کلتور سره سمه جامع طرحه جوړه او د اسلامي امارت د مشرتابه حکم وشي بيا به مکاتبو او ليسو ته رسماً خبر ورکول شي."
ملګرو ملتونو ويلي د طالبانو دغه پرېکړې 1.1ملينه جينکۍ اغېزمنې کړي دي.
د ملګرو ملتونو د بشري حقونو مشر مارټن ګريفټس د شورا غړو ته ویلي، "په نړۍ کې بل يو داسې هېواد نشته چې د سيکنډري سکولونو څخه جينکۍ منع کوي".
طالبانو په افغانستان کې بې د نارينه و څخه د ښځو په ګرځېدو هم بندېز لګولی او په 7 مې يې ټولو ښځو ته امر کړی چې مخونه او سرونه پټ ساتي او په کورونو کې پاتې شي.
په ملګرو ملتونو کې د امریکا استازې ترينه ساها ويلي، "که طالبان د نړيوالې ټولنې سره خپلې اړيکې سمول غواړي، بايد په سمدستي توګه د ښځو د ټولنيز ژوند ، سياسي او اقتصادي ژوند څخه لرې نه ساتلو په اړوند ګامونه پورته کړي".
طالبان چې په افغانستان کې په واک کې راغلي تراوسه يو ملک هم د طالبانو حکومت په رسميت نه دی پېژندلی.
د افغانستان دپاره د ملګرو ملتونو د مرستو او همکارۍاستازي رميز الکبروف د کابل نه د ويډيو لنک د لارې د شورا غړو ته ويلي مونږ د طالبانو د حکومتي ځواکونو او وسله والو سياسي مخاليفينو ترمېنځ په پنجشېر او بغلان ولايتونو کې نښتې وينو، هم دغسې وينو چې سیاسي مخالفين او داعش په طالبانو بريدونه کوي.
د ګل يا دوشنبې په ورځ ملګرو د طالبانو د 13 غړو سفري بندېزونه غځولي او د تعلیم په برخه کې اړونده دوه طالب چارواکو باندې يې دغه سفري بنديز په ځای کړی دی.
د طالبانو يو لوړ پوړي چارواکي د ملګرو ملتونو دغه اقدام ته غېر مخلصانه او ناانصافي ويلي وو.
يوې فعالې يلدا رويان ويلي، که په راتلونکو 60 ورځو کې د ښځو د حقونو په اړوند کوم پرمختګ ونه شو، د طالبانو په مشرانو دې سفري بنديزونه ولګول شي.
هغې پوښتنه راولاړه کړې، که افغان مېرمنۍ/ ښځې په ازاده نه شي ګرځېدی نو طالبان دې ولې ګرځي.
