واشنګټن - د امریکا حکومت په نړۍ کې د انسانانو د قاچاق/سمګلېنګ د ارزونې په برخه کې خپل کلنی رپوټ جاري کړی او په هغه کې یې افغانستان، چین، او روس د هغو ملکونو په ډله کې شمارلي کوم چې د انساني قاچاق له اړخه د فکرمندۍ وړ ګڼل کیږي.
د امریکا د خارجه وزارت له خوا دغه شایع شوي رپوټ کې برما، کمبوډیا، ارېتریا، شمالي کوریا، جنوبي سوډان او ونزوېلا هم په هغو څلورویشتو (۲۴) ملکونو کې ګڼل شوي کوم چې د انساني سمګلنګ له اړخه دریمه درجه یا تر ټولو ناوړه ګټګورۍ کې شامل دي.
د دې ارزونې ترمخه، درېیمه درجه ملکونه هغه دي چې د انساني سملګنګ سره د مقابلې په برخه کې یې حد اقل معیار هم نه وي پوره کړی او په دې لاره کې یې کوم د پام وړ کوښښ هم نه دی څرګند کړی. دغه ډول ملکونه د ممکنه پابندیو سره مخ کېدلی شي.
د امریکا د خارجه وزارت په دې رپوټ کې، لېبیا، صومالي او یمن، چېرته چې د خانه جنګیو له امله د معلوماتو راټولول ستونزمن دي، دا ملکونه یې "خاص کېسونه" بللي دي.
د امریکا د خارجه وزیر انټني بلېنکن په وینا، د سږ کال رپوټ څو د فکرمندۍ وړ ځانګړتیاوې په ګوته کوي – د هلکانو او ځوانو نارینه و په سمګلنګ کې اضافه، د جبري کار دوامداره اضافه، او د آنلائن تېراېستلو یا دوکه کولو د لارې د مزدورانو د سمګلنګ سېوا کېدل.
ښاغلي بلېنکن وویل: " [د کرونا وایرس] عالمي وبا، دا ټرېنډ زښته زیات کړ. سمګلرانو د پراخې بې روزګارۍ نه په ګټه اخېستلو سره، په دې سرمایه کاري وکړه چې د جعلي دندو/کارونو په فهرستونو سره خلک ښکار کړي او بیا هغوی مجبوره کړي چې په بین الاقوامي کچه د جعل او دوکه کولو کاروبار مخ ته یوسي."
بلينکن د ۲۰۲۳ کال په رپوټ کې د مسلسلې ترقۍ یادونه هم وکړه او ویې ویل چې د نړۍ په لسهاوو ملکونه د انساني سمګلنګ د مخنیوي، د ښکار شوو خلکو د تحفظ، او عدالت ته د مجرمینو د راکاږلو په برخه کې د پام وړ کامیابۍ حاصلې کړي دي.
