د بې پولې خبريالانو نړیوال سازمان [ار اېس اېف] پاکستان کې د خبريالانو د حقونو دپاره کوونکي فريډم نېټ ورک، د خبريالانو تنظيمونو او پرېس کلبونو په سياسي ګوندونو غږ کړی، په راتلونکو انتخاباتو کې دې د اظهار رای ازادي او خبريالانو تحفظ يقيني کړي.
ار اېس اېف او فریډم نېټ ورک ویلي، پاکستان کې په تېرو لسو کلونو کې د خبریالانو د وژنو په 96 فېصده قضيو کې تورنو کسانو ته سزاګانې نه دي ورکړل شوي.
ار اېس اېف، فريډم نېټ ورک، پاکستان کې پرېس کلبونو او د خبريالانو تنظيمونو په سياسي ګوندونو غږ کړی، د راتلونکو انتخاباتو دپاره دې په خپل منشور کې د اظهار رای ازادي او خبريالانو د ساتنې عزم څرګند کړي.
فريډم نېټ ورک خپور کړي بيان کې ویلي، پاکستان کې د انتخاباتو نه وړاندې خبريالانو ته ورپېښې خطرې سېوا کيږي او د وړاندې په پرتله حالات نور زيات خراب شوي دی.
بيان کې ویل شوي، رسنیو کې کار کوونکو او د هغو د مرستیالانو ضد جرمونو کې ککړو ته استثنا د زياتې اندېښنې وړ ده او خبريالان نور د سختو خطرو سره مخ کوي، او دا کار د پاکستان ولس د پوهې او معلوماتو ته د رسايۍ څخه محرومه کوي کوم دوه بنيادي حقونه چې د پاکستان ايين ورکړي دي.
د ار اېس اېف د سيويلي اسيا څانګې ویلي، د انتخاباتو په مهال د خبريالانو او رسنیو د ازادۍ او ساتنې کار د سياسي ګوندونو په لاس کې دی، او سیاسي ګوندونه دې د خبريالانو د تحفظ دپاره د قانون سازۍ لارې ولټوي، د خبريالانو کلبونو، تنظيمونو او سازمانونو په وړانديزونو د عمل کولو دپاره دې ژمنې وکړي.
پاکستان کې د راتلونکو عامو انتخاباتو دپاره الېکشن کمېشن د حلقه بندیانو ابتدايي فهرست جاري کړی او اعلان یې کړی، "د 2024م کال د جنورۍ په وروستۍ اوونۍ کې به انتخابات کولی شي".
د خبريالانو د حقونو او رسنیو د ازاديو دپاره کار کوونکي ځايي او نړیوال تنظيمونه وايي، پاکستان کې خبريالان د خطرو سره مخ دي او رسنۍ د فشار لاندې ساتل کيږي.
خو حکومتونه وخت په وخت د خبريالانو د ساتنې او ازادو رسنیو دعوې کوي.
د پاکستان د اطلاعاتو نګران وزير مرتضا سولنګي هم په وروستیو کې ویلي، انتخاباتو کې به ټولو سیاسي ګوندونو ته په رسنیو کې يو شان موقع ورکولی شي، رسنیو ته به د بیان ازادي وي خبريالان به معلوماتو ترلاسه کولو ته پوره رسايي لري.
Forum