د خېبرپښتونخوا د ډېره اسماعيل خان او ټانک ضلعو ترمنځ منځني سړک دپاسه د امنيتي ځواکونو په قافله چاودنه شوې، لږ تر لږه دوه امنيتي اهلکار پکې وژل شوي او د 22 نورو ژوبلېدو خبر دی.
د ډېره اسماعیل خان پوليسو مطبوعاتو سره په شريک کړي خبر کې ویلي، د ډېره اسماعيل خان، ټانک په سړک دپاسه د امنيتي ځواکونو په ګاډي ځانمرګی بريد شوی دی.
په خبر کې ويل شوي د امنيتي ځواکونو قافله د ټانک نه ډېره اسماعيل خان ته په لاره وه او ځانمرګی بريد پرې شوی دی.
د پوليسو په وينا، په پېښه کې ژوبل کسان پوځي روغتون ته منتقل کړل شوي، پوليس او پوځ د پېښې ځای ته رسېدلي، د ډېره اسماعيل خان او ټانک سړک د هر ډول تګ راتګ دپاره تړل شوی دي.
د بريد ذمه واري سمدست چا نه ده قبوله کړې. پوځ هم په رسمي ډول د بريد په اړه څه نه دي ویلي.
خېبرپښتونخوا او قبايلي ضلعو کې په وروستيو کې د پاکستان په پوځ او نورو قانون نافذونکو ادارو وسله وال بريدونه يو ځل بيا سېوا شوي دي.
په (16م مارچ) د افغانستان سره په پوله پرتې قبايلي ضلعې شمالي وزیرستان په میرعلي سیمه کې د پوځ په یوه پوسته یو ستر خونړی برید شوی، دوه لوړپوړي پوځي افسران او پینځه عسکر پکې وژل شوي وو.
د يادې پېښې وروسته د پاکستان له لوري په افغانستان کې د بمبارۍ او بيا د طالبانو لخوا په پوله په پاکستاني ځواکونو بريدونه شوي وو.
پاکستان ويلي وو، خوست او پکتيکا کې یې د طالبانو د حافظ ګل بهادر ډلې وسله وال په هدف کړي خو په افغانستان کې واکمنو طالبانو ويلي وو، پاکستان د عامو وګړو کورونه بمبار کړي، اته تنه (شپږ ښځې او دوه ماشومان) یې وژلي وو.
بيا د افغانستان د لوري په پاکستاني ځواکونو بريدونو کې هم د مرګ ژوبلو خبرونه مخې ته راغلي خو دغه مرګ ژوبلې د دواړو خواو څخه په رسمي ډول نه دي تاييد کړل شوي.
د يادو پېښو وروسته د کورمې او شمالي وزيرستان د افغانستان سره د خرلاچي او غلام لارې د هر ډول تګ راتګ دپاره تړل شوې وې چې تراوسه تړلې پرتې دي.
پرون د بلوچستان صوبې د ساحلي ښار ګوادر کې د ګوادر بندر په اتارټي کمپليکس ودانۍ وسله وال برید شوی، دوه امنیتي عسکر او د اتوو ترهګرو وژلو ويل شوي وو.
بلوڅ لبرېشن ارمي نومې ډلې د دغه بريد زمه واري منلې وه.
Forum