پاکستان کې د اتمې فرورۍ د عامو انتخاباتو وروسته د حکومتونو جوړولو خبرې روانې دي، د پاکستان پيپلز ګوند مشر بلاول بټو زرداري ويلي، "ماته ويل شوي چې اولني درې کاله مونږ له راکړه او وروستي دوه کاله تاسو وزيراعظم جوړ شئ، ما د دغې خبرې نه انکار کړی ".
بلاول بټو زرداي د سيند صوبې په ټهټه ضلعه کې يوې جلسې ته په وينا کې دغه خبره کړې، د چا نوم یې نه دی اخستی چې چا ورته ویلي دي، خو د پاکستان پيپلز ګوند او مسلم ليګ ن ګوند ترمنځ په مرکز کې د ګډ حکومت جوړولو خبرې روانې دي.
او د بلاول د بيان وروسته پاکستان مسلم ليګ ن ګوند ويلي، د دواړو ګوندونو ترمنځ خبره شوې وه چې د جوړو شوو رابطه کارو کمېټيانو کوم غړی يا مشر به د خبرو په وخت په دغه اړه کومه بيان بازي نه کوي.
په اېکس (پخواني ټویټر) خپور بيان کې مسلم ليګ ن ګوند ويلي، "د فريقېنو ترمنځ ختمي خبرې نه دي شوي د مشورو څلور دورې شوي او پينځم نشت نن د ګل/دوشنبې په ورځ ټاکل شوی، مهم پرمختګ کېدی شي".
بلاول ويلي، "داسې انتخابات شوي چې هر څوک احتجاج کوي، که چا ګټلې هغه هم احتجاج کوي او که چا بايللې هغه هم"، هغه ويلي د دوی سره هم ګډوډي شوې ده خو دوی د پاکستان بچ کولو فېصله کړې ده.
هغه زياته کړې، په 1977 کې هم چې ذوالفقار علي انتخابات ګټلي وو اول د درغلۍ تورونه لګول شوي او بيا چې تحریک وچلېدو، جمهوري نظام د مينځه لاړو او بيا مونږ لس کاله د جنرل ضيا د امریت سره مخ شو، نن بيا هغه ډول خبرې کيږي.
پاکستان تحریک انصاف ګوند په خپل ځای دعوې کوي چې د قومي اسمبلۍ تر ټولو زياتې څوکۍ يې ګټلي، خو درغلي ورسره شوې او نتيجې یې بدلې شوي او احتجاجونه کوي.
پاکستان تحریک انصاف ګوند هم دعوه کوي چې په مرکز او پنجاب صوبو کې به حکومتونه جوړوي.
پاکستان مسلم ليګ ن ګوند د وزیراعظم د څوکۍ دپاره شهباز شریف نومولی دی.
بلاول بټو زرداري ویلي، "زمونږ نه ووټونه غوښتل شوي خو وزراتونه نه اخلو د ولس ګټې ته به ګورو او د صدر امېدوار به اصف علي زرداري وي".
اصف علي زرداري د بلاول بټو زرداري پلار، د پيپلز ګوند شريک مشر دی او وړاندې هم صدر پاتې شوی دی.
Forum