افغان حکومت د امریکا هوايي ځواک له لوري د هیواد په شمال کې له چین او تاجکستان سره پر پوله د جوز جان په سیمه کې د طالبانو او داعش په هدف کولو د هوایي بریدونو هرکلی وکړ او د نورو بریدونو غوښتنه یې هم کړې ده.
د جوزجان سیمه ییزو چارواکو ویلي، په دې هوايي بمبارۍ کې د داعش ډلې ۲۵ وسلوال وژل شوي. په بمبارۍ کې د نوموړې ډلې د ګومارنې، روزنې مرکزونه او یو زندان هم له منځه وړل شوي دي.
د جوزجان د والي ویاند رضا غفوري ډیوه ته ویلي چې د دې ولایت د نورو ولسوالیو په پرتله په دېزاب او خوشتپه ولسوالیو کې د داعش او طالبانو ډلې ډېر فعالیتونه لري او ډېر ژر به په دغو ولسوالیو کې ځمکني او هوايي عملیات پیل کړي.
د طالبانو پر مرکزونو باندې تازه هوایي بریدونه له هغې وروسته پیل شول، چې د طالبانو ډلې په دې وروستیو کې په ټولنیزو رسنیو کې یو شمېر تصویرونه خپاره کړل او په هغوی کې لیدل کېدل چې د دې ډلې وسلوال په واورینو سیمو کې په ژمنيو تمرینونو بوخت وو.
په افغانستان کې امریکايي ځواکونو له چین او تاجکستان سره پر پوله د طالبانو او داعش پر پټنځایونو باندې هوایي بریدونه زیات کړي دي.
په افغانستان کې د ناټو ځواکونو عمومي قوماندان جنرل جان نیکلسن ویلي، چې طالبان نور د هېواد په هیڅ یوه برخه کې د پټېدو ځای نه لري:
"هیڅ یوه ترهګره ډله به پناهځای ونه لري چې دوی له ځایه په ګټې اخیستو افغانستان ته زیان ور ورسوي".