په افغانستان کې د ملګرملتونو مرستندویه پلاوي، یوناما، د ښځو د حقونو او د تعلیم د هغو افغان فعالانو په اړه تشویش څرګند کړی چې د واکمنو طالبانو په بند کې دي او غوښتنه یې کړې چې طالبان دې د خلکو "خپل سري" نیولو لړۍ ودروي.
یوناما د شورو، چهارشنبې، په ورځ په سوشل میډیا د احمد فهیم عظیمي، صدیق الله افغان او منیژه صدیقي په اړه د اندېښمۍ اظهار وکړو چې د اکتوبر د میاشت راهسې په حراست کې دي.
"یوناما د خپلسرو نیونو دپای ته رسولو غوښتنه کوي او غواړي چې دکورنۍ له غړو سره د تماس، وکیلانو ته د لاسرسي، پاملرنې او د عادلانه محاکمې حقونه دې ورته خوندي وي،" یوناما په پښتو ژبه کې په خپله فېس بک پاڼه وویل.
د وي او ای اشنا څانګې د رپورټ ترمخه د طالبانو د حکومت ویاند ذبیح الله مجاهد ملي تلویزیون سره په مرکه کې د یوناما د غوښتنې ته په جواب وویل په افغانستان کې په خپلسر ډول نیونې نشته او په دې برخه کې ترسره کېدونکي اجراات قانوني او د شریعت مطابق دي.
نړیواله ټولنه د ښځو په اړه د طالبانو د ګامونو مخالفت کوي او غوښتنه کوي چې طالبان دې د ښځو په تعلیم، کار روزګار او د سفر بندیزونه لرې کړي.
طالبانو د بیا واکمنېدو نه پس افغان مېرمنو د خپلو حقونو د تحفظ دپاره په کابل کې یو شمېر مظاهرې هم کړي دي او فعالان وايي طالبانو د مظاهرو ختمولو دپاره د طاقت او زور زیاتي نه کار اخیستی دی.
د اشنا څانګې د رپورټ ترمخه، د افغانستان د ښځو سیاسي مشارکت نومې یو تحریک چې د ښځو د حقونو دپاره کار کوي په کابل کې طالبانو دلاسه د ښځو او نجونو په نیول کېدو تنقید کړی دی.
تحریک ویلي په دې وروستیو ورځو کې په خصوصي توګه د کابل په دشت برچي کې وضعیت ډیر خراب شوی او طالبان "په ډیر وحشیانه ډول د بدحجابۍ په بهانه" نجونې نیسي او نامعلوم ځای ته یې وړي.
Forum