د نېټو هېوادونو د اتحاد سيکرټري جنرل سټولټنبرګ ويلي، په افغانستان کې د سولې د خبرو د وروستوالي او مرګ ژوبلو زياتېدو باوجود نېټو په دغه هېواد کې د سولې ژمنه کوي.
د شورو، چهارشنبې په ورځ په برسلز کې د نېټو هېوادونو د وزيرانو په کچ دوه ورځنۍ غونډې ته په وېنا کې هغه وويل " مونږ نن بيا په افغانستان کې د اوږدې مودې د سولې او ثبات ژمنه کوو ".
په افغانستان کې د امریکايي ځواکونو د مشرۍ دپاره نومول شوي لفټننټ جنرل کېنېت مېکنزی روانه اوونۍ د امریکا د سېنېټ د وسله والو خدمتونو کمېټۍ ته ويلي افغان ځواکونه لا نه دي توانېدلي چې طالبان بې وسلې کړي.
د رپوټونو ترمخه طالبان دا وخت په افغانستان کې نزدې ۶۰ زره دي، او د نېټو ځواکونه د ځايي افغان ځواکونو د مشورۍ او مرستې دپاره ۱۶ زره سرتيري لري.
په افغانستان کې د کال ۲۰۱۵نه وروسته نېټو جګړه ييز ماموريتونه پرېښودي او په له دې دغې په راوروستو کلونو کې د افغان ځواکونو د مرګ ژوبلو شمېره بيا سېوا شوې ده.
تېره مياشت افغان صدر اشرف غني ويلي ؤ په دغه موده کې د افغانستان ځايي ۳۰ زره سرتيري وژل شوي دي.
سټولټنبرګ ویلي طالبان په دې پوهه دي چې روانه جګړه يواځې د تاوان سبب ګرځي، او دوي بايد د خبرو مېز ته راشي او نېټو د افغانستان مرستې ته ژمنه ده.
نوموړي د مرګ ژوبلو د سېوا کېدو د خبرې اعتراف کړی او زیاته کړې يې ده کله کله د تشدد سېوا کېدو د لارې ځينې فريقېن د ښه موقعيت ترلاسه کولو هڅه کوي.
د غونډې وروسته د افغانستان د بهرنيو چارو وزير صلاح الدين رباني ویلي، هېواد يې لېواله دی چې د جګړې پای ته رسولو په لړ کې د نېټو او نړیوالو ملګرو سره همکاري وکړي.
په برسلز کې د غونډې وروسته د نېټو هېوادونو د بهرنيو چارو وزيرانو يو ځل بيا د طالبانو او افغان دولت نېغ په نېغه خبرو غږ کړی دی.