واشنګټڼ: په افغانستان کې د ټاکنو خپلواک کمیسیون او د ولسمشرۍ په ټاکنو کې د اشرف غني لومړي مرستیال امر الله صالح، انتخاباتو ته د طالبانو د وروستي ګواښ په غبرګون کې ویلي، افغانان به په ډیموکراټیکو لارو واک ترلاسه کوي.
امر الله صالح د طالبانو د ګواښونو په غبرګون کې په چټکۍ سره په خپل ټوېټر باندې لیکلي دي:
"د ترهګرو طالبانو لخوا د ټاکنو د بهیر ګواښول کومه نوې خبره نه ده. طالبان ددې لپاره جوړ شوي او ترې ملاتړ کېږي چې افغانستان وځپي او د مذهب تر نامه لاندې داسې یو زوړ سیستم په افغانستان کې جوړ کړي چې د پاکستاني اسټبلېشمنټ حریصې او خونخوارې بلا ته پرې څه برابر کړي. دوی له جعلي افغانانو پرته بل څه نه دي."
Denouncement of elections by terrorist Talibn isn%27t a news. It is a narrative without taste.They are created & backed to suppress a nation, bring about medieval system in the name of religion to feed the greedy beast of Pakistani establishment.They are nothing but "sham Afghans".
— Amrullah Saleh (@AmrullahSaleh2) August 6, 2019
د افغانستان د ټاکنو خپلواک کمېسیون د طالبانو دې خبرداري ته په غبرګون کې ویلي، افغانان د پوځې لارې نه بلکې د ډیموکراټیکو لارو چارو واک ته رسېدل غواړي.
وسله والو طالبانو له راتلونکو ولسمشریزو ټاکنو سره د مخالفت په ښودلو له خلکو غوښتي چې په ټاکنیزو غونډو کې ګډون ونه کړي.
دغې ډلې خپلو وسله والو ته په ټاکنیز بهیر باندې د بریدونو امر کړی.
طالبانو تر دې مخکې هم د ټاکنو په بهیر کې د یو شمېر رایه ورکونکو ګوټې پرې کړې وې.
تېره اونۍ د افغانستان د راتلونکو ولسمشریزو ټاکنو لپاره ټاکنیز کمپاینونه پيل شول.
طالبان پر داسې مهال دا مخالفت کوي چې د ټاکنیزو کمپاینونو د پیلېدو په لومړۍ ورځ په راتلونکو ټاکنو کې د اشرف غني د لومړي مرستیال امرالله صالح پر دفتر موټر بم او ډله ییز برید کې شاوخوا ۳۰ تنه ووژل شول او ۵۰ نور ټپیان شول، خو پړه یې لا تر اوسه هم کومې ډلې په غاړه نه ده اخیستی.
د طالبانو ګواښونه او د سولې خبرې:
د ټاکنو د بهیر په وړاندې د طالبانو دغه ګواښونه له یوې خوا او له بلې خوا په دوحه کې د افغانستان د سولې په اړه د امریکا او طالبانو ترمنځ خبرې وروستي پړاو ته نږدې کېدونکي دي.
داسې ښکاري چې د تړون په بنسټیزو برخو باندې توافق شوی او اوس یې د پلي کېدو په بهیر باندې وروستۍ خبرې روانې دي.
د طالبانو ویاند سهیل شاهین امریکا غږ ته وویل، دوی په خبرو کې پرمختګ کړی خو د هر څه د نهايي کېدو لپاره خبرې دوام لري.
د افغانستان د سولې د خبرو لپاره د امریکا ځانګړي استازي زلمي خلیلزاد په دوحه کې له طالبانو سره تر خبرو وروسته په یو ټویټ کې لیکلي:
"په کابل کې د تېرې اونۍ د ډیر ښه پرمختګ پسې، زه تېرو څو ورځو کې دوحې کې وم او پر پاتې هغو مسایلو مې غور کاوه چې له طالبانو سره یوه شونې معامله بشپړولی شي او د شرایطو په اساس د ځواکونو وتل شونی کولی شي. مونږ ډېر ښه پرمختګ کړی دی."
په کابل کې د تیرې اونۍ د ډیر ښه پرمختګ پسې، زه تیرو څو ورځو کې دوحې کې وم او پر پاتو هغو مسایلو مې غور کاوه چې له طالبانو سره یوه شونې معامله بشپړولی شي او د شرایطو په اساس، د ځواکونو وتل شونی کولی شي. موږ ډیر ښه پرمختګ کړی دی.
— U.S. Special Representative Zalmay Khalilzad (@US4AfghanPeace) August 5, 2019
خلیلزاد تېره ورځ په یو بل ټویټ کې لیکلي چې ډهلي ته روانېږي تر څو له وړاندې نه یو شمېر تنظیم شوې لیدنې وکړي تر څو د افغانستان د سولې د بهیر په ملاتړ نړیواله اجماع نوره هم پیاوړې شي.
د امریکا او طالبانو ترمنځ د تړون په څلورو مهمو برخو کې له افغانستان څخه د امریکايي ځواکونو وتل، په بدل کې یې د افغانستان له خاورې د نورو امنیت نه ګواښول، د کابل د حکومت په ګډون له نورو افغانانو سره خبرې کول او په ټول هېواد کې د اوربند یا ډز بندۍ اعلانېدل دي.
که چېرې دواړه غاړې په دغه تړون باندې موافقه وکړي نو له دې سره به په افغانستان کې د امریکايي پوځ تر ټولو اوږده ۱۸ کلنه جګړه پای ته ورسېږي.