واشنګټن ــــ د بلوچستان په ساحلي ښار ګوادر کې پر امنیتي ځواکونو باندې شوې یوه تازه حمله کې د رپورټونو له مخې لږ تر لږه 14 ملېشه عسکر وژل شوي او ګڼ شمېر ټپیان شوي خو یو مرکزي وزیر وایي شپږ عسکر وژل شوي دي. د برید ذمه واري د "براس" په نوم تنظیم منلې ده.
د بلوچستان وزیراعلی جام کمال دا پېښه غندلې او پر ټویټر یې لیکلي دي "د بلوچستان پر کوسټل های وې د قانون نافذوونکو کسانو د قیمتي ځانونو ضایع کېدل دا ښکاره نخښه ده چې دښمن بلوچستان او د بلوچستان خلک سوکاله نه شي لیدای".
Loss of precious law enforcement lives on Balochistan Coastal highway is a clear sign the enemy does not want Balochistan and its people to prosper....
— Jam Kamal Khan (@jam_kamal) October 15, 2020
د پاکستان ملېشه ځواکونو دغه برید تایید کړی او وایي په امنیتي ځواکونو باندې دغه حمله د ګوادر ضلعې په ساحلي اورماړه سیمه کې شوې ده. د ګوادر یوه انتظامي چارواکي د وي او اې ډیوه خبریال حمید سمسور ته ویلي، وسلوالو د پنجشنبې- زیارت په مازیګر د اورماړې د سرپټ په سیمه کې پر امنیتي ځواکونو ډزې کړې دي.
دغه انتظامي چارواکي ویلي وسلوالو د ملېشه ځواکونو پر دوو موټرو لومړی د راکټونو او وروسته یې د توپکو ډزې ورباندې کړې دي چې وایي له کبله یې د ملېشه وو پر دواړو موټرو اور لګېدلی دی.
چارواکي وایي د ملېشه ځواکونو دغو دوو موټرو د پاکستان د تېلو او ګېسو د ادارې او جي ډي سي ایل د موټرو بدرګه کوله چې له ګوادره کراچۍ ته روان وو.
پر ټولنیزو رسنیو د دغې پېښې په خپاره شوو دوو عکسونو کې لیدل کېږي چې یو ځای یو موټر سوځېدلی او د موټر شاته څلور پینځه تنه په اور سوځېدلي پراته دي او په بله عکس کې څلور ملېشه عسکر په ډزو لګېدلي مړه پراته دي.
ځایي چارواکي وایي د راکټونو او ډزو په نتیجه کې 14 ملېشه عسکر وژل شوي خو د پاکستان د کورنیو چارو مرکزي وزیر اعجاز شاه رسنیو ته ویلي، چې په دې پېښه کې شپږ عسکر وژل شوي دي.
د بلوچستان د مالیاتو صوبایي وزیر ظهور بلېدي هم دا پېښه غندلې او پر ټویټر یې لیکلي "ترهګرو ته د دوی د جرمونو سزا ورکول او هغوی د عبرت مثال جوړولو د بلوچستان د حکومت ذمه واري ده چې پوره کېږي به".
اورماڑہ میں FC کے قافلے پر انسانیت اور وطن دشمنوں کے حملے میں ایف سی اہلکاروں کی شہادت کا واقعہ انسانیت سوز ہے۔ دہشت گردوں کو ان کے جرائم کی سزا دلوانا اور انہیں عبرت کی مثال بنانا بلوچستان حکومت کی زمہ داری ہے جو پوری کی جائیگی۔
— Zahoor Buledi (@ZahoorBuledi) October 15, 2020
د دې برید ذمه واري د بلوچ راجي آجویي سنګر (براس) په نامه د خپلواکي غوښتونکو بلوڅانو د وسلوالو تنظیمونو اتحاد پر غاړه اخیستې او دعوه یې کړې چې په برید کې یې تر پینځلس زیات عسکر وژلي او ټپیان کړي دي.
اورماړه د ګوادر ضلع تحصیل دی چې له لسبېلې ضلعې سره پر پوله پرته ده او په دې سیمه کې د ازادي غوښتونکو بلوڅانو تنظیمونه بي ایل اې، بي آر اې او بي ایل ایف ډېر فعال دي چې په ګوادر کې د چین پاکستان اقتصادي راهدارۍ سیپېک پرمختیایي کارونه نه پرېږدي.
د 2019م کال په اپرېل میاشت کې هم وسلوالو د مکران پر ساحلي لار د بوزیټاپ په سیمه کې مسافر بسونه درولي وو او د هغوی د شناختي کارډونو تر کتلو وروسته یې 14 امنیتي عسکر وژلي وو، چې ذمه واري یې د بلوچ راجي آجویي سنګر (براس) په نامه د وسلوالو بلوڅانو یو متحد تنظیم منلې وه.