واشنګټن ـــــ د ملګرو ملتونو د امنیت شورا په افغانستان کې د طالبانو له خوا په غیرسرکاري کورنيو او نړیوالو ادارو کې د ښځو پر کار د بندیز د پرېکړې په اړه په روانه جنورۍ میاشت کې غونډه کوي.
په ملګرو ملتونو کې د متحده عربي اماراتو د دفتر ویاندې شهاد مطر په یو ټویټ کې ویلي دي، چې د بندو دروازو تر شا دا غونډه د عرب اماراتو او جاپان په وړاندیز جوړیږي. په ټویټ کې لیکل شوي:
"متحده عربي اماراتو او جاپان د ملګرو ملتونو له امنیت شورا غوښتي، چې په افغانستان کې د [د ښځو په اړه] د طالبانو د وروستیو پرېکړو او د بشري حالت په ګډون د دغو پرېکړو د اغېزو په رڼا کې د جنورۍ پر 13مه یوه ځانګړې غونډه را غواړي".
The UAE & Japan called for a private meeting of the #UNSC on Afghanistan to be convened on 13 January in light of the latest decisions announced by the Taliban and their impact, including on the humanitarian situation.Read the UAE’s latest statement 📄: https://t.co/a3rHhKEgwh
— Shahad Matar (@UAEUNSpox) January 4, 2023
په ملګرو ملتونو کې د متحده عربي اماراتو دایمي استازې لانا نسیبې هم د پنجشنبې- زیارت په ورځ په یو بیان کې د طالبانو دا پرېکړه په سختو ټکو غندلې ده چې ښځې یې په غیرسرکاري ادارو کې له کارونو منع کړې دي.
مېرمن لانا نسیبې ویلي په داسې حال کې چې د افغانستان په درو کې دوې برخې وګړي بشري مرستو ته اړتیا لري او شپږ میلینه خلک له لوږې سره مخ دي، په غیرسرکاري ادارو کې د ښځو پر کار د طالبانو د بندیز پرېکړه به د بشري مرستو د رسولو کارونه لا ډېر له خنډ سره مخ کړي:
"د افغانستان او د دې هېواد د خلکو ښه راتلونکی او ښېګړه په ټولنه کې د ښځو او نجونو په بشپړ ګډون پورې اړه لري".
د عرب اماراتو سفیرې ویلي دي چې د طالبانو دا پرېکړه ښځو ماشومانو، لویانو او نورو بشري مرستو ته اړو کسانو ته لا نورې ستونځې جوړوي. مېرمن نسیبې په ټینګار سره ویلي:
"دا پرېکړه چې د طالبانو له خوا د ښځو او نجونو د لوړو زدکړو په وروستي او نه منلو وړ بندیز پسې مخې ته راغلې ده، د ملګرو ملتونو د امنیت شورا له 2615 قرارداد څخه سرغړونه ده او شک نه شته چې دا به په افغانستان کې انساني ناورین لا زیات کړي".
د تېر کال په وروستیو ورځو کې د طالبانو حکومت کورنیو او بهرنیو غیرسرکاري ادارو یا انجوګانو ته امر وکړ چې په سمدستي توګه د افغانو ښځو کارونه له دې کبله وځنډوي چې د دوی په وینا هغوی اسلامي حجاب او په کار کې له سړیو د بېلوالي امر نه عملي کوي.
د افغانستان لپاره د ملګرو ملتونو د سیاسي او مرسته کوونکي دفتر یوناما مشر مارکِس پوټزل په تېرو څو ورځو کې د طالبانو له مشرانو سره لیدلي دي، یوناما پرون د طالبانو د ريس الوزرا له مرستیال مولوي عبدالکبیر سره د ښاغلي پوټزل تر لیدو وروسته لیکلي:
"د افغان ښځو له حقونو انکار کول ټول افغانان زیانمنوي او مهمې بشري مرستې ګډوډوي. د سترې اقتصادي بدبختۍ او د افغانستان د انزوا [یواځیتوب] د مخنیوي لپاره دښځو پر زدکړو او کار د بندیز لرې کول اړين دي".
د ملګرو ملتونو په امنیت شورا کې د عربي اماراتو سفیرې لانا نسیبې په ټینګار سره ویلي، چې اسلام د ښځو رول ته درناوی لري او د هغوی د حقونو ساتنه کوي. هغې د ژوند په ټولو برخو کې د افغانو ښځو او نجونو د پوره او برابرې برخې پر اهمیت ټینګار وکړ.
متحده عربي اماراتو ویلي چې له خپلو سیمه ییزو او نړیوالو همکارانو سره په همکارۍ به د افغانستان د خپلواکۍ، ارامۍ، امن او سوکالۍ په برخه کې پر خپلو اوږدمهاله ژمنو ټینګ پاته شي.
د طالبانو حکومت د 2021م کال په ستمبر کې تر شپږم ټولګي پورته د نجونو سکولونه بند کړل او د 2022م کال د دسمبر پر 20مه یې په ټولو سرکاري او شخصي پوهنتونونو کې د ښځو او نجونو زدکړې "تر بل امر پورې" وځنډولې.