واشنګټن ـــــ د پاکستان د مخکیني وزیراعظم عمران خان پر تازه مرکه باندې په ټولنیزو رسنیو کې نیوکې شوې دي چې هغه وایي که نړۍ له افغان طالبانو سره اړیکې نه جوړوي نو هغوی د نجونو د تعلیم په ګډون هیڅ خبرو ته غوږ نه نیسي او نه یې عملي کوي.
عمران خان د مارچ پر 23مه د برتانیې له 4News چېنل سره په تازه مرکه کې د طالبانو حکومت ته په اشارې ویلي، دی افغانان تر هر چا خصوصاً تر غربي هېوادونو ښه پېژني او د ده په نظر افغانان نه غواړي بل څوک ورته ووایي چې باید څه وکړي.
مرکه کوونکي له عمران خانه وپوښتل چې پاکستان پر طالبانو زیات اغېز لري، آیا دی به طالبانو ته ووایي چې نجونې سکول ته پرېږدي، عمران خان یې په جواب کې د طالبانو له خوا د نجونو د ښوونځیو او پوهنتونونو بندول ونه غندل او ویې ویل:
"که غربي هېوادونه غواړي د افغانستان پر اوسني حکومت اغېز ولري ضرور یې باید مېن سټریم [اړیکې ورسره عادي] کړي، زه بیا بیا وایم چې له دوی سره خبرې وکړئ، که دوی ګوښه وساتئ نو څنګه به اغېز ورباندې ولرئ".
د تعلیم لپاره مبارزه کوونکي او د نوبل انعام ګټونکې ملالې یوسفزۍ پلار ضیاء الدین یوسفزي د عمران خان پر دې خبره نیوکه کړې او وایي د هغه د خبرې معنا خو دا ده چې "طالبان پرېږدئ چې څنګه غواړي هغسې فیصله دې وکړي".
ضیاء الدین یوسفزي د جمعې په ورځ د عمران خان د مرکې کلیپ ته په جواب کې پر خپل ټویټر لیکلي:
"دلته عمران خان د هغو پینځه میلینه افغانو ښځو او نجونو په اړه زښته زیات غیرحساس دی چې [د طالبانو] یو 'درآمد شوي حکومت' یې تر شپږم پورته سکولونو او پوهنتونونو ته پر تګ سخت بندیز لګولی دی".
Here Imran Khan is extremely insensitive to the 5 Million Afghan women and girls who have been effectively banned from going to secondary schools and universities by an ‘ imported regime’.Indeed he means, “ Let the Taliban decide what the want.”#LetAfghanGirlsLearn https://t.co/loulKeIU9h
— Ziauddin Yousafzai (@ZiauddinY) March 24, 2023
د امریکې او پاکستان په ګډون د نړۍ هیڅ هېواد هم لا د طالبانو حکومت په رسمیت نه دی پېژندلی او ترې غواړي چې د ښځو او نجونو د کار او تعلیم حقونو ته درناوی ولري او یو داسې ټولشموله حکومت جوړ کړي چې ټول افغانان پکې استازیتوب ولري.
عمران خان وایي نړۍ باید لومړی له طالبانو سره اړیکې جوړې کړي او اجازه ورکړي چې هغوی هم له نړۍ سره ښکېل شي بیا دې د بشري حقونو په اړه خبرې ورته وکړي، وایي په داسې حال کې چې پیسې یې کنګل شوې دي ولې به هغوی نړۍ ته غوږ نیسي:
"زما مشوره دا ده چې هغوی [طالبانو] مصروفه کړئ او په نړیواله ټولنه کې ځای ورکړئ بیا که ورته ووایئ چې نجونې تعلیم ته پرېږدئ اوري به مو، اوس مو نه اوري او پر دې غبرګون ښیي وایي تاسې څوک یئ چې زموږ په کورنیو چارو کې مداخله کوئ".
په امریکا کې مېشت د پاکستان د دفاعي او سیاسي چارو څېړونکي پروفیسر ډاکټر عقیل شاه هم د عمران خان پر دې خبره نیوکه کړې چې هغه په مرکه کې ویلي، "زه افغان کرکټر [کردار] په غرب کې تر هر چا ښه پېژنم".
پروفیسر عقیل شاه د جمعې په ورځ پر ټویټر لیکلي، "د عمران خان غوندې نسل پرستو مستشرقینو [ختیځپوهانو] له ذهنونو پرته هیڅ 'افغان کرکټر' نه شته".
I know the “Afghan character better than anyone in the West.” There is no “Afghan character” except in the minds of racist Orientalists like Imran Khan. https://t.co/sw8WoWNzHs
— Aqil Shah (@AqilShah_) March 24, 2023
د پاکستان یو فعال منیب قادر هم د عمران خان پر خبرو سخته نیوکه کړې او د هغه ټولو خبرو ته یې جواب ویلی دی. منیب قادر پر خپل ټویټر لیکلي چې عمران خان وایي افغانان خپلې فیصلې ته پرېږدئ د دې مطلب خو دا دی چې دی د افغانستان نیمه ابادي ښځې افغانې نه ګڼي.
منیب قادر لیکلي عمران خان چې څه ویل غواړي د هغه مطلب دا دی چې طالبان له ښځو سره د دویمې درجې انسانانو چلند کوي دا ده ته د منلو وړ دي او د ده په وینا "جنسیتي توپیر" ورته د منلو وړ دی:
It%27s amazing how Imran Khan NEVER speaks up for women, even when presented with the opportunity to do so. Tonight,he was asked again whether he approved of the T@liban%27s ban on women%27s education. Imran Khan%27s reply (as usual) was, %27Let the Afghans decide what they want%27. Dude,… pic.twitter.com/9eR8o78nHX
— Muneeb Qadir (@muneebqadirmmq) March 23, 2023
"دا خبره چې 'له دوی سره په خبرو کې ښکېل شئ' بېخي بې بنیاده خبره ده، ایا نړۍ د زلمي خلیلزاد په مشرۍ د افغان سولې په خبرو کې له طالبانو سره ګډون نه وو کړی، په دغو خبرو کې هیڅ افغانه ښځه هم نه وه او که یو افغان طالب ارب پتي شوی هم وای، بیا به یې هم نجونې او ښځې کله هم سکول او پوهنتون ته نه پرېیښې".
عمران خان د پاکستان د وزیراعظم په توګه د نړۍ لومړی رهبر وو، چې د 2021م کال په اګست کې پر افغانستان د طالبانو د واکمنۍ تود هرکلی یې کړی وو او هغوی ته په اشارې یې ویلي وو چې "افغانانو د غلامۍ زنځیرونه مات کړل".
له هغه را وروسته د خپل حکومت په مهال هم او په تېر شاوخوا یو کال کې په بېلابېلو ویناوو او مرکه کې هم عمران خان په ټینګار سره له نړۍ غوښتي چې د طالبانو له حکومت سره اړیکې جوړې کړي او د هغوی د حکومت په رسمیت پېژندلو یا منلو ته لاره جوړه کړي خو خپله د عمران خان حکومت هم د هغوی حکومت په رسمي توګه نه وو منلی.