ټاکل شوې ده چې د افغانستان کرکټ لوبډله، سږکال د اگست په میاشت کې ایرلنډ ته ولاړه شي او د هغه هیواد د کرکټ لوبډلې سره، شپږ لوبې وکړي.
په دې شپږو لوبو کې به، درې یې ټي ټونټي یا شل آوره لوبې، او درې نورې به یې او ډي آیی، یا یو ورځینۍ لوبې (پنځوس آوره) وي. دا لوبې د اگست په ٢٠مه نیټه، پیل شي چې لومړۍ درې شل آوریزه لوبې، د ایرلنډ په بریډي ښارگوټي کې، او درې پنځوس آوریزه لوبې به په بلفاسټ ښار کې ترسره شي.
ایرلنډ او افغانستان همدا څو میاشتې مخکې، د ټیسټ میچونو په برخه کې د نړۍ یوولسم او دوولسم ملکونه وگرځیدل. دواړو ټیمونو له خپلو سیالانو سره لومړي ټیسټ میچونه وکړل، خو لوبې یې ونه گټلې. له دې ناکامۍ سره سره، خو دواړو ته په راتلونکې کې د پرمختگ لارې پرانیستل شوي او ښه چانسونه په مخ کې لري.
ایرلنډ او افغانستان دواړو خپل لومړۍ ټیست لوبې، د هند ټیم ته وبایلودې.
د افغانستان کرکټ ټیم به په اگست میاشت کې د ایرلنډ دوره کوي او د ایرلنډ د ټیم روزونکی (کوچ)، گراهام فورډ، وایي چې دې سیریز کې به دواړو ټیمونو ته د ودې او تجربې اخیستلو ښه موقع په لاس ورشي. فورډ وایي: «د افغانستان سیریز به د یوې ښې تابیا چانس وي، ځکه موږ ته به د دې سیریز په شپږو لوبو کې، د کرکټ د یوې غوره کچې سیال سره د مقابلې موقعه راکړي.»
تر دې وړاندې، افغانستان او ایرلنډ په ٢٠١٧ کال کې پنځه لوبې وکړې چې ټوله یې افغانستان گټلې وې. د تیر کال دغه پنځه لوبې، ټوله یې شل آوریزې وې چې درې یې په هند کې، یوه یې په دوبی او یوه یې هم په ابوظبي کې ترسره شوې وې.
یاده دې وي چې اوس مهال د افغانستان د کرکټ تکړه لوبغاړي، راشد خان، محمد نبي، او مجیب ځدراڼ، د انگلینډ په ویټالي بلاسټ لیگ کې، او نجیب ځدراڼ، د کاناډا د کرکټ په لیگ کې لوبې کوي.