د ترهگرۍ په تور کې د عارضي ضمانت ورستو د جنوبي وزیرستان نه د قومي اسمبلۍ منتخب غړي علي وزير په ځان لگیدلي د ترهگرۍ تورونه رد کړي دي او وايي ترهگر نه دی.
د شمالي وزیرستان او جنوبي وزیرستان نه د قامي اسمبلۍ غړي او د پښتون ژغورنې غورځنگ فعالان محسن داوړ او علي وزیر د سپټمبر په 20 مه نیټه د شپې ناوخته د هري پور زندان څخه په عارضي ضمانت ازاد شوي وو.
په علي وزير او محسن داوړ د مۍ په 26 مه نیټه د شمالي وزیرستان په خړ کمر کې په پوځي چيک پوسته د برید او له هغې وروسته په اووم جون د پوځ په يو گاډي د چاودنې په تور کې مقدمې جوړې شوې او تر څلورو میاشتو بنديوان وو.
علي وزير وي او ای ډیوه ته په یوه ځانگړې مرکه کې اوویل په تر هگرۍ کې چې څوک اووژل شي یا ژوبل شي هغويي ته حکومت مالي کمکونه نه ورکوي.
هغه اوویل چې کوم تنان د خړ کمر په چیک پوسته کې اوژل شوي یا ژوبل شوي وو حکومت ورته شل شل لکه روپۍ ورکړی او د فوځ کورکمانډر او د صوبې اعلا وزير یې کورونو ته ورغلل، علي وزير په سوالیه انداز کېې اوویل:
"چې چا په پوسټ حمله کړي وي هغويي ته معاوضه ورکړی کیږي؟"
د خپل ضمانت په حقله د ېوې پوښتنې په ځواب کې علي وزير اوویل ضمانت یې داسې وشو چې خبرې اترې روانې وې کسان به ورتلل. علي وزير اوویل دغو کسانو ته یې د ځان د سپیناوي باور ورکړو:
"د ریاست د پالیسۍ (تگلارې) سره مونږ اختلاف لرو نو د هغه پالیسي اختلاف مونږ وضاحت کوو".
هغه اوویل دغو کسانو ته یې دا هم اوویل:
"نور چې تاسو کوم الزامات لگوئ، مونږ به صفايي درکوو"
هغه اوویل که چري دويي صفايي او نه کړله یا دويي د بل کوم ملک سره په رابطه کې وو یا دويي د پاکستان داسې څه کمی کړی وي نو چې کومه نمونه صفايي غواړئ دويي به زموار وي.
هغه وویل تر یوې میاشتې پورې به د دويي د چال چلن څارنه کیږي، دويي به د عدالت د فیصلې، قانون او ایئن احترام کوي.
هغه اوویل د جنوبي وزیرستان د سفر د نه کولو تاکيد ورته شوې وو:
" تاسو وزيرستان ته مه درومئ"
علي وزير د خړ کمر چیک پوستې د ورځې د پېښې په حقله اوویل چې کله په خړ کمر پوسته په دوي ډزې شورو شوې نو ملگرو ورته ویل چې اوتښته خو ده ورته انکار وکړو.
د علي وزير په قول چې کله دی په خړکمر کې اونیول شو نو ډېر زیات تششد ورباندې شوې وو، هغه وویل:
"زما په مخکښې په ژوبلو تنانو ډزې کېدلی او وژل کیدل".
د علي وزير په خیال په هري پور جیل کې د ترهگرو سره په یو ځاي کې ساتل شوی وو خو چې کله ناروغه شو نو بیا یې درملنه هم وشوه.
د پاکستان د قانون تر مخه د قامي اسمبلۍ د اسپيکر په اختیار کې وي چې یو منتخب غړی د جیل نه د اسمبلۍ غونډی ته بللی شي.
په دې حقله د یو سوال په جواب کې علي وزیر اوویل چې دويي اسد قيصر ته ووټ ورکړی وو او د پښتو په سر یې ورکړی وو او ورته یې ويلي وو چې په پښتو یې درکوو.
هغه اوویل کیدی شي بې وسي یې وي خو دده په اختیار کې وه:
" زمونږ پروډکشن ارډر یې کړی وې"
د علي وزير د جیل په موده کې د هغه مور خوږه مينه بي بي د هغه د خوشي کیدلو لپاره پښتنو ته د پاڅیدلو اپيل کړی وو.
علي وزير اوویل چې نن (سپټمبر 22) کور ته ورسیدلو نو مور ېې ورته منی (امېل) نیولی وو:
"بچیه دا منی زه درته اچومه"
علي وزير وايي مور ورته اوویل که ته زر نه وی راغلی نو دې به شک کوو چې ما سر ټیټ کړی دی، هغه وايي مور یې ورته ویل:
" بیا به ما په تا سلام نه اچولې، بیا به ما ویل چې کیدی شي تا داسې خبرې کړي وي چې یعني کمپرومايز به دې کړې وي.. بیا به ما د قوم نه معافي غوښتلې"