د هندوستان د پخواني وزیراعظم، اتل بیهاري واجپائي په مړینه باندې، د سیمې او نړۍ په کچه د خپگان څرگندونې شوې دي.
د هندوستان پخوانی وزیر اعظم، اتل بیهاري واجپائی، د زیارت یا پنجشنبې په ورځ د ٩٣ کلونو په عمر د ورپیښې شوې ناروغۍ له امله مړ شو.
واجپائی د بهارتیا جیناتا د گوند یو مشر و چې درې ځله د هندوستان وزیراعظم ټاکل شوی و.
د امریکې د بهرنیو چارو وزیر، مایک پامپیو، د یو بیان په جاري کولو سره ویلي چې د امریکې د خلکو په استازیتوب، د هند خلکو ته د اتل بیهاري واجپائي د مړینې له کبله تسلیت ورکوي.
د امریکې د بهرنیو چارو د وزیر په بیان کې راغلي چې: «هغه [واجپائي] د خپل ملک د پرمختگ لپاره د یو اتل په شان نه ستړې کیدونکې هلې ځلې وکړې او د هر هندوستاني د ژوند د ښه کولو دپاره یې سخت کوښښ وکړ.»
ښاغلي پامپیو دا هم ویلي چې واجپائي هغه وخت چې وزیراعظم و، د امریکې او هند ترمنځ د اړیکو پر ښه کولو ټینگار وکړ او «نن، زموږ دوو هیوادونو او زموږ دوه اړخیزې اړیکې د وزیراعظم واجپائي د تصور نه گټه پورته کوي.»
د پاکستان ځینو سیاستمدارانو او صحافیانو هم د هندوستان د پخواني وزیراعظم، اتل بیهاري واجپائی پر مړینه خپگان څرگند کړی دی.
د تحریک انصاف گوند یو بیان جاري کړی چې ترمخې یې، د نوموړي گوند مشر او د پاکستان متوقع وزیر اعظم، عمران خان هم د واجپائی پر مړینې سخت خپگان ښودلی او ویلي یې دي چې د واجپائی مرگ، د منطقې په سیاست کې یوه خلا رامنځته کړې، او په کار ده چې د سولې لپاره د هغه هلو ځلو ته د قدر ورکولو په خاطر، هند او پاکستان د سولې په لور گام اوچت کړي.
د پاکستان یو سناتور، مشاهد حسین هم د واجپائی مړینه یو نه جبرانیدونکې ضایعه بللې او ویلي یې دي چې هغه د سولې یو آئیکن و.