په افغانستان د طالبانو د واکمنېدو شپږ میاشتې وشوې خو په نړیواله کچه یې حکومت نه دی منل شوی، او په امريکا کې مېشت افغانان د وطن په اړه د نااميدۍ څرګندونه کوي.
په امريکا کې مېشت افغانان وايي ملک یې د اقتصادي، مالي او د یو شمېر نورو ستونزو سره مخامخ دی.
د امریکې په نیویارک ښار کې مېشت شېر جان وايي طالبان باید هغه شرايط ومني چې په رسمیت د پيژندلو دپاره ترې نړۍ غوښتنه کوي.
انجنېر عبدالقاهر دريځ لري چې د طالبانو د واکمنېدو سره که د هېواد کنټرول د يوې ډلې په لاس ورغلی خو په افغانستان کې د پرمختګ روانې پروژې په ځای ودرېدلي دي.
په افغانستان د طالبانو د واکمنېدو نه پس نړیوالې ټولنې هلته د انساني او مېرمنو د حقونو په اړه تشویش څرګند کړی دی.
نړیوالې ټولنې د طالبانو په موقتي کابینه کې د مېرمنو په عدم موجودګۍ تشویش څرګند کړی دی او په کابل کې مېرمنو د خپلو حقونو د تحفظ دپاره یو شمېر مظاهرې هم کړي دي.
که څه هم طالبانو لوظونه کړي چې د مېرمنو او په عموموي توګه د افغانانو د انساني حقونو احترام به کوي خو د انساني حقونو تنظیمونه وايي د طالبانو ځینې اقدامات څرګندوي چې په تېرو شلو کلونو کې د مېرمنو د حقونو په برخه کې چې کوم پرمختګ شوی طالبان یې په شا بوتلل غواړي. د ځینو مطبوعاتي رپورټونو ترمخه په کابل کې د مظاهرو په مهال طالبانو د مېرمنو په ضد د تشدد نه هم کار اخیستلی دی.
د کابل نه علاوه د افغانستان په بېلا بېلو ولايتونو کې هم د طالبانو په ضد احتجاجونه شوي دي او پکې په طالبانو الزام پورې شوی چې د انساني حقونو خلاف ورزۍ کوي.
په امريکا کې مېشته ښکلا مجددي وايي د طالب ډلې د واک سره د هېواد دننه د مېرمنو حقونه تروړل کېږي، بايد نړۍ د دې غږ ملګرې شي.
د ملګرو ملتونو د کډوالو ادارې څو ورځې وړاندې په خپل يو رپورټ کې ويلي وو په افغانستان کې د مېرمنو تحفظ په خطر کې دی او په شپږو مياشتو کې شاوخوا اووه لکه افغانانو خپل کورونه پرېښودي دي۔