د کرکټ د اېشیا کپ په وړمبي مېچ کې پاکستان د شورو، چهارشنبې، په ورځ په ملتان کې نيپال ته په ۲۳۸ رنز ماتی ورکړو.
د پاکستان کپتان او بېټر بابر اعظم ۱۵۱ رنز او افتخاراحمد ۱۰۹ رنز جوړ کړل.
د پاکستان د ۳۴۳ رنزونو په تعقب کې د نیپال ټیم په ۱۰۴ رنز اوټ شو.
د پاکستان شاداب خان څلور وېکټې، شاهین شاه افریدي او حارث روف دوه دوه وکټې واخیستلې.
د وي او ای د اردو څانګې د رپورټ ترمخه په اېشیا کپ کې شپږ ټیمان لوبېږي چې په دوو ګروپونو کې وېشل شوي دي.
د پاکستان، هندوستان او نیپال ټیمونه په ای ګروپ کې او د بنګله دېش، افغانستان او سري لنکا ټیمونه په بي ګروپ کې شامل دي.
د اېشیا کپ د څلورو مېچونو کوربتوب به پاکستان او نهه مېچونه به په سري لنکا کې کېږي.
په پاکستان کې د اېشیا کپ باقې پاتې درې مېچونه به په لاهور کې وي.
هندوستان په پاکستان کې د لوبېدو نه انکار کړی دی.
یادونه: د دې خبر معلومات د ای اېف پي خبري نه هم اخیستل شوي دي