که څه هم ځیني څیړونکي وايي په پاکستان د اسرایلو د تسلیمولو د فشارخبرونه بې ځایه نه دي او د یروشلم سره د اسلام اباد د سفارتي اړیکې جوړولو وړاندیزونه کوي خو د هیواد پوځ د حکومت دا خبره تايد کړې چې تر څو د فلسطینیانو حقونه تروړل کېږي پاکستان به داسې کوم ګام نه اخلي.
د پاکستان د پوځ ویاند جنرل بابر افتخار ويلي پوځ د اسرایلو په اړه د حکومت د تګ لارې ملاتړ کوي.
د انګريزۍ ژبى ورځپاڼې دي نيوز ته جنرل افتخار ویلي دي پوځ د مرکزي حکومت د فلسطين او اسرایلو د تګلارې ملاتړ کوي.
د اخبار په آند جنرل دا تاثر هم رد کړى چې ګني پوځ په مرکزې حکومت باندې د اسرایلو د منلو لپاره فشار اچوي.
د اسرایلي وزیراعظم بینجمېن نېتن یاهو د سعودي عرب د شهزاده سليمان سره د ملاقات خبر مخې ته راتلو سره سم په مطبوعاتو کې بيا دا ګنګوسى دي چي خلیجي هېوادونه په پاکستان باندى د اسرایلو د سره اړيکو لپاره فشار اچوي.
د سعودي او اسرايلي مشرانو د ليدو خبر لا د رېښتيا يا دروغو د امتحان نه تېر شوی نه وو چې اسلام اباد يو ځل بيا په يو ليکلي بيان کې د اسرايلو منل د فلسطين سره مشروط کړل.
که د عرب اماراتو او بحرېن وروسته، سعودي هم بغېر له کومه شرطه اسرايل سره اړيکې سموي نو ايا پاکستان به هم بغېر شرطه د اسرايل سره سفارتي اړيکې جوړوي؟
په کراچۍ کې مېشت د منځني ختیځ د چارو څېړونکی محمد علي صدیقي انادولو خبري ایجنسۍ ته ویلي، دا امکان نه شي ردېدی چې ریاض دې له اسرایلو د اړیکو د عادي کولو لپاره پر پاکستان فشار اچولی وي:
عمران خان د نومبر پر 12مه د پاکستان له یوه شخصي ټیلیویژن سره په ځانګړې مرکه کې د کوم هېواد نوم وا نه خیست خو ویل پر پاکستان فشار دی چې له اسرایلو سره اړیکې عادي کړي.
خو د پاکستان د بهرنیو چارو وزارت ویاند بيا ویلي وو، چې د عمران خان خبره ناسمه نقل شوې ده او دا خبره یې رد کړې ده چې په پاکستان باندې له اسرایلو سره د اړیکو جوړولو فشار دی.
پخوانی سفارتکار اياز وزير وايي دپاکستان بيله بيل حکومتونو د اسرایلو سره پټې سفارتي رابطې ساتلي خو د طاقتور پوځ سره يو حکومت هم د اسریلو د منلو د پرېکړې توان نه لري.
د سفارتي چارو یو بل ماهر ډاکټر اعجاز خټک فکر کوي پاکستان کې د نورو معاملو په څير خارجه تګلارې ته هم د مذهب په سترګه کتلى کېږي.
اعجاز خټک وي او ای ډيوه ته ويلي که د فلسطينيانو د ځیني مهمو حقونو ضمانت ورکړى شو نو پاکستان بيا د اسرایلو سره د اړيکو پحقله په ډاډ کوم ګام پورته کولى شي.
هغه وویل اسرایل ېو حقيقت دى او نن دى که سبا پاکستان به ېې هم مني.
اعجاز خټک وايي د جذباتي خبرو په ځاى دې په پاکستان کى په دې موضوع عام بحث وکړی شي.
د پاکستان د خارجه وزارت ترمخه پاکستان د يو خپلواکه فلسطيني رياست جوړښت غواړي او داهم چې د کال 1967 عرب اسرایل جګړى نه وړاندى د پولو حدونه په ځای کړي شي.