د پاکستان د پېسو په بازار کې نن په دویمه ورځ هم (د اکتوبر په ١٠ مه نېټه) د ډالر په مقابل کې د روپۍ بیه نه یوازې ټېټه وه بلکې د روپۍ د نورې غورځیدو له وېرې په بازار کې بې باوري لیدل کیدله.
د وي او ای ډیوه خبریال احسان محمد خان د کرنسۍ ځینو کاروباریانو سره خبرې کړې چې وايي په دویمه ورځ د یو ډالر بیه د ١٣٣ او ١۴٠ روپو پورې اوړېده راوړېده.
د شورو، چارشنبې، په ورځ د پاکستان ډان ورځپاڼې په ویب پاڼه چاپ شوي د انټربینک ریټ یا د ډالر په مقابل کې د روپۍ رسمی بیه ١٣٣ روپۍ وه.
په بازاز کې د ډالر دوه بېۍ وي. یوه بیه د اخیستو او بله د خرڅولو. د انټر بېنک ریټ د نرخ ترمخه که څوک خپلې ډالرې خرڅوي نو د یو ډالر په مقابل کې به ١٣٣ روپۍ ترلاسه کوي او که څوک د روپو په بدل کې ډالر اخلي نو د یو ډالر دپاره به ١٣۴ روپۍ ورکوي.
د ډیوه خبریال وايي د شورو، چارشنبې، په ورځ په بازار کې غیر یقیني حالات وو او دا ویره موجود وه چې گنې روپۍ نوره هم غورځیدی شي.
اقتصاد پوهه او د پېښور یونیورسټۍ د اقتصادیاتو د څانگې مشر زلاکت خان ملک وايي د روپۍ د غورځیدو په نتیجه کې نه د هېواد خارجی قرضو په مالیت کې اضافه وشي. د وی او ای ډیوه سره خبرو کې ښاغلي ملک وویل د روپۍ بیه به نوره هم کمیږي ځکه چې د "روپۍ دپاره به بهر طلب کم وي او د بهرنیو کرنسیانو لکه ډالرشو، پاونډ شو او یورو په پاکستان کې به د هغې طلب زیات وي نو بیا به د روپۍ قدر غورځیږي."
ماهرین وايي د روپۍ د غورځیدو په وجه به په تجارت هم منفي اثر وغورځیږي، واردات یا امپورټس به زیات شي او د هېواد دننه به د گرانۍ کچه نوره پورته شي.