نن په واشنګټن کې د ولسمشر بايډن او افغان ولسمشر اشرف غني تر منځ د غونډې په وخت په پاکستان کې په ټوېټر تر ټولو لوړ ټرېنډ #TalibanOurGuardians دی—معنا—طالبان زمونږ ساتونکي دي.
د ياد ټرېنډ په نامه نن ورځ تر دې دمه د 15000 نه زيات ټويټس شوي دي. دا ټرېنډ په پاکستان کې اکثره داسې کسانو جوړ کړی چې په افغانستان کې طالبان په واک کې ليدل غواړي.
پاکستان په حکومتي کچه د طالبانو سره د ملاتړ تورونه ردوي او نن هم د خارجه چارو وزير شاه محمود قرېشي ويلي امريکا او نړۍ په افغانستان کې د پاکستان مثبت رول مني.
د طالبانو په ملاتړ کې د جوړ ټرېنډ په اړه په امريکا کې د پاکستان پخوانی سفير حسېن حقاني وايي داسې ټرېنډونه جوړول دا ثابتوي چې د وزير اعظم عمران خان د افغانستان په اړه د بې پلوۍ خبرې دروغ دي.
That #TalibanOurGuardians is among top trends on #Pakistan twitter is alarming. In trending it, @PTIofficial supporters are proving that their PM & FM are lying when they say Pakistan does not want a Taliban victory or does not have close ties with them. pic.twitter.com/XxYHYlSFUU
— Husain Haqqani (@husainhaqqani) June 25, 2021
په نن ورځ د طالبانو سره د ملاتړ ټرېنډ جوړولو يو علت کېدای شي دا وي چې افغان ولسمشر غني د امريکا ولسمشر بايډن سره ويني.
د دې ليدو کتو په اړه د پاکستان د خارجه چارو وزير د مخکې نه وېره څرګند کړې وه چې که افغان مشران د اففانسنان مسوليت په پاکستان اچوي نو اسلام اباد به يې ونه مني.
ددې ټرینډ په اړه په پاکستان کې د بشري حقونو فعالانو او کيڼ پالي سیاست دانانو په ټولنیزو رسنیو د فکر مندۍ څرګندونې کړي دي.
له شمالي وزیرستانه د پاکستان د قامي اسمبلۍ غړي محسن داوړ د یاد ټرینډ په هکله په خپل ټویټر لیکلي دي دا ټرینډ ځورونکی دی. ښاغلی داوړ لیکي:
“د “نامعلومو” دا ټرینډ چې طالبان زمونږ ساتونکي دي ځورونکی دی”.
هغه په خپل ټویټ کې تپوس کړی, که چري طالبان زمونږ ساتونکي دي نو د 70000 پاکستانیان چا وژلي دي؟ د ارمي پبلک سکول ماشومان چا وژلي؟ ددوي لپاره ځمکني ماینونو چا ښځ کړي وو؟
It is troubling to see #TalibanOurGuardians being trended by "na malooms". If Taliban are our guardians then who killed those 70 thousand Pakistani victims of terror? Who killed the children of APS? Who were the land mines planted for that are now maiming children in Waziristan? https://t.co/OE4hUnXFRb
— Mohsin Dawar (@mjdawar) June 25, 2021
د پاکستان کوم حکومتي یا پوځي چارواکي ددې ټرینډ د جوړونکیو یا مخالفت کونکیو په هکله څه دریځ نه دی ښودلی خو په ورستیو کې د پاکستان د پوځ مشر جنرل قمر جاوید څو ځله په خپلو وینا ګانو کې ویلي هیواد یې د باندینیو چیلنجونو نه پرته د ففت جنرېشن وار فیر یعني د جدیدې ټیکنالوجۍ په دور کې د مخالفینو د پروپیګنډو مقابله هم کوي. هغه د خپل هیواد اولس په ځانکړی کچه نوي نسل ته نصحیت کړی ؤ دغه جګړې ته دې ويښ اوسي.