په پاکستان کې د شخصي ټي وي چینلو نشریات د هېواد په گڼ شمېر برخو کې نه لیدل کیږي او ټولنيز رسنۍ هم تړل شوی دي. د مذهبي گوند لبیک یا رسول الله د پرلت په ضد د حکومتي عملیاتو په وخت چینلو ته د نیغ په نیغه نشریات نه ښودلو امر شوی ؤ. د ټي وي چینلود څارنې او ورته د کار کولو لپاره لایسنس ورکولو ادارې پېمرا چینلو ته یو خط کې ليکلي دي چې د بې ارامۍ په وخت دې نیغ په نیغه خپرونې نه کوي.
پاکستانۍ ورځپاڼې ليکي د گڼ شمېر ټي وي چینلو نشریات بند دي خو ورځپاڼه ډان ليکي دا واضحه نه ده چې د ټي وي چېنلیو د تړلو امر چا کړی دی
اخبار نوای وقت د ټي وي چینلو په تړلو یوه بیړنۍ اخباري ضميمه چاپ کړی ده. اخبار ليکي د پرلت په ضد د عملیاتو په وخت رسنۍ او ټي وي نشریات بند دي .
د پېښور څخه د ډیوه خبریال خبر راکوي چې په کیبلو نن دغرمې نه وروستو شخصي چینلې نه لیدل کیږي اؤ یوازې په سرکاري ټي وي خپرونې روانې دي.
د سر ښار اسلام اباد څخه خبریالان وايي زیاتر خلک د اسلام اباد د کړکيچلي حال نه دځان خبر ساتلو دپاره په یوټیوب خبرونه گوري.
په پېښور کې یو ځلمي وکيل رحيم خان په خپل ټویټر پاڼه ليکلي دي " ټویټر، یو ټیوب، او فیس بک هم په هر ځای کې بند دي"
په پاکستان کې وړاندې هم د اړي گړي په وخت د ټي وي چینلو په نشریاتو پابندۍ لگول شوي دي. ځيني خبریالانو د ټي وي چینلو تړلو په سر په حکومت نيوکې کړي دي .