افغانستان کې د طالبانو حکومت د سویډن د ټولو فعالیتونو مخه نیولې ده اؤ ویلي یې دي ترڅو چې سویډن د قرآن کریم د سوځول کېدو په پېښه له مسلمانانو بخښنه نه وي غوښتې افغانستان کې به هیڅ رقم فعالیت نه شي کولی.
د طالبانو حکومت (چې هغوي یې اسلامي امارت بولي) د سه شنبې- نهې په ورځ پخپله یوه اعلامیه کې ویلي چې سویډن کې د الله د کتاب سپکاوی شوی اؤ د مسلمانانو د عقیدې د توهین اجازه ورکول شوې ده.
په 28م جون د لوی اختر په ورځ د سويډن په پلازمېنه سټاک هوم کې د مرکزي جومات نه بهر یو 37 کلن عراقي سویډش سلوان موميکا نومي تن د احتجاج په توګه قرآن سوځولی ؤ او د دغه کار دپاره یې د پوليس نه اجازت غوښتی ؤ.
ددغې پېښې پرضد د نړۍ یو شمیر اسلامي هیوادونو کې سخت غبرګونه ښودل شوي اؤ دا عمل دمذهبي کرکو سېوا کولو په معنا بلل شوی دی.
د افغان طالبانو حکومت پخپله اعلامیه کې ویلي" ترڅو چي د دې شوم عمل له امله له مسلمانانو څخه عفوه نه وي غوښتل شوې اسلامي امارت به افغانستان کې د سویدن هېواد د هر ډول فعالیت د دریدو امر کوي".
په اعلامیه کې د افغانستان دننه اړونده ادارو ته امر شوی چي د يادې لارښوونې د تعمیل لپاره په بیړه لاس په کار شي .
د طالبانو حکومت د نړۍ له نورو مسلمانو هېوادونو هم غوښتنه کړې ده چې د سویډن د "ګستاخانه عمل" په وړاندې له دغه هېواد سره په خپل تعامل غور وكړي
د يادې پېښې پرضد دپاکستان اؤ ترکي په شمول په ګڼو ملکونو کې احتجاجونه شوي دي اؤ د رپورټونو ترمخه د سويډن حکومت دغه پېښه غندلې ده.
تېره اوونۍ 57 اسلامي ملکونو غوښتنه کړې وه چې د قران د بې حرمتۍ خلاف دې اجتماعي ګامونه واخیستل شي او د مذهب په بنیاد نفرت خپرولو خلاف دې نړیوال قانون استعمال کړی شي.
