د يمن په پلازمينه صنعا کې د ځانمرگو بريدونو چې پکې ۱۳۷ کسان وژل شوي يوه ورځ وروستو امريکې د يمن نه خپل ټول کارمندان بيرته بللي دي . د امريکې محکمه خارجه لخوا جاري شوي بيان ترمخه دغه عارضي بدلون يمن کې دامنيت د گډو وډو حالاتو له کبله کيږي .
د يمن په جنوب کې موقعيت لرونکې الاناد فضائي اډه کې د امريکې د سپيشل فورس ۱۰۰ اهلکار موجود وو ، دغه اډه به امريکې په يمن کې د ډرون د لارې د القاعده د هدفونو په نخښه کولو دپاره کاروله .
محکمه خارجه وئيلي ، چې امريکا به يمن کې د ترهگرۍ د خطرو جائزه اخلي ، او په سيمه کې د ترهگرۍ د مخنيوي صلاحيت يې هم لري .
بل لور ته د ملگرو ملتونو سلامتي کونسل د اتوار په ورځ د يمن په اړه هنگامي غونډه کوي .
يمن کې کړکېچنو حالاتو ته په کتو صدر منصورهادي تېره مياشت د رخصتې وروستو د خالي په ورځ په لمړۍ په ځل ټيلي ويژن وينا کړې ده .
د جنوبي ښارعدن نه په وينا کې منصورهادي د حوثي شيعه ياغيانو نه غوښتي دي چې د حکومتي وزارتونو د ودانو قبضه پرېږدي ، خپل وسله وال د پلازمېنې نه اوباسي او د ملگروملتونو په مرسته پېل شوؤ د امن خبرو ته واپس راشي .
نوموړي څو ورځې وړاندې عدن کې په صدارتي ماڼۍ د نامالومه جنگې الوتکې څخه داغل شوي ميزائيل غندنه کړې او دا يې د هغه په ضد د بغاوت هڅه بللې ده ، په دغې پېښه کې هادي روغ پاتې شوی ؤ .
په کال ۲۰۱۲م کې د يو تحريک په نتيجه کې د صدرعلي عبدالله صالح د حکومت ختمېدو وروستو يمن د تشدد او بدامنۍ په پېښو کې گېردی .
د ايران اتحادي حوثيانو تېر کال د ستمبر په مياشت کې پلازمينه په خپله ولقه اخيستې ، د سُنيانو سره يې جگړه روانه ده او د خپل واک غزولو هڅه کوي .
واشنگټن کې د يمن د سفارتخانې يو وياند محمدالباشا د خالي په ورځ ټويټر باندې خپل پېغام کې وئيلي چې "هغه په يمن کې د جنگ غږېدونکو نغارو اوازونه اوري".
