د افغانستان د قومي کرکټ ټيم کپتان محمدنبي عيسی خېل نن په يوه خبري غونډه کې د قومي کرکټ ټيم د کپتانۍ څخه استعفی ورکړه ، او ويې وئيل استعفی يې په خپله خوښه ورکړه او په کپتانۍ کې يې ښه لوبه نه شوه کولی .
محمدنبي عيسی خېل چې د تېرو دوؤ کلونو راهسې د افغانستان د قومي کرکټ ټيم کپتان ؤ ، خبري غونډې ته يې په وينا کې د استعفې ورکولو سره ووئيل ، چې د يو لوبغاړي په توگه به ټيم سره لوبې ته دوام ورکوي ، او خپلې تجربې به د نوي کپتان سره شريکوي .
هغه ووئيل ، د دوؤ کالونو راهسې مې د قومي ټيم کپتاني وکړه ډېرې کاميابۍ مو ترلاسه کړې او ټيم مو په نړيوال کپ کې ولوبېدو او په نړيواله کچه يې ستائنه وشوه
نبي عيسی خېل زياته کړه د کپتانۍ څخه يې په خپله خوښه استعفی ورکړه ، کوم فشار پرې نه ؤ . هغه ووئيل د کپتانۍ د فشار له کبله يې هغه رنگ لوبه نه شوه کولی کوم ډول لوبه چې يې د کپتانۍ نه وړاندې کوله .
نوموړی دوه کاله وړاندې د نوروز مېنگل نه وروستو د افغانستان د قومي کرکټ ټيم کپتان ټاکل شوی ؤ .
د افغانستان کرکټ بورډ مشر نسيم الله دانش د محمدنبي په اړه خبري غونډې ته په وېنا کې ووئيل ، هغه بريالی لوبغاړی دی او لاس ته راوړنې يې د ستائينې وړ دي .
دانش زياته کړه نبي عيسی خېل په خپله مرضۍ استعفی ورکړه فشار پرې نه ؤ او کرکټ بورډ د هغه په استعفی خفه دی .
نوموړي ووئيل په نزدو کې به د کرکټ بورډ ټاکنيزه کميټي د قومي کرکټ ټيم دپاره نوی کپتان وټاکي .
محمدنبي عيسی خېل چې ۳۰ کلن دی او ال راؤنډر لوبغاړی دی ، هغه تر اوسه پورې د افغانستان له لوري ۵۱ نړيوال يو ورځنو ، ۲۵ ټي ټيوينټي (۲۰اووريز) او ۲۵ ټېسټ مېچونو کې لوبېدلی دی .
