د پاکستان وزيراعظم نوازشريف په مشرۍ د سياسي ډلو د مشرانو سره په يوه غونډه کې پرېکړه شوې چې د چين ـ پاکستان اکنامک کوريډور (سي پي اي سي) اقتصادي راهدارۍ په لويديځه لار باندې به کار ته لمړيتوب ورکولی شي .
د جمعې په ورځ اسلام اباد کې د سياسي ګوندونو د مشرانو سره د غونډې نه پس د وزيراعظم د دفتر لخوا په جاري شوي يو بيان کې وئيل شوي چې وزيراعظم د لويديځې لارې عملي کولو په لړ کې په تېزۍ سره کار کولو هدايات ورکړ ي دي .
د سياسي مشرانو سره د صلاح مشورې د غونډې نه پس وزيراعظم هاؤس دغه اعلان کړی چې د څلورو واړو صوبو د اعلی وزيرانو يوه سټيرينګ کميټي به جوړولی شي او هغه به د لويديځې لارې د پرمختګ جاج اخلي .
راپورونه وايي د کميټۍ مشري به وزيراعظم نوازشريف په خپله کوي او هر درې مياشتې پس به يې غونډه کيږي .
د اقتصادي راهدارۍ د منصوبې په سر د وزيراعظم په مشرۍ د سياسي ګوندونو د مشرانو سره د صلاح غونډه په داسې مهال شوې چې د خېبرپښتونخوا د قام پرست ډلو سره صوبايي حکومت او دغه ډول د بلوچستان قام پرست ګوندونه هم په راهدارۍ د تحفظاتو څرګندونه کوي .
د وزيراعظم په مشرۍ غونډه کې چې د ټولو سياسي ګوندونو مشرانو او د خېبرپښتونخوا صوبې اعلی وزيرپروېزخټک هم ګډون کړی ، په دغه مهال دا پرېکړه هم شوې چې د راهدارۍ د لارې سره سره به په اقتصادي زونونو جوړولو هم صوبو سره صلا ح کولی شي .
د غونډې نه پس د عوامي نيشنل ګوند يو مشر افراسياب خټک مطبوعاتو سره خبرو کې ووئيل وزيراعظم ورته په دويم ځل باور ورکړی چې په لويديځه لار باندې به اقتصادي زونونه او د شرقي لار په رنګ نورې منصوبې هم جوړولی شي .
او د خېبرپښتونخوا صوبې اعلی وزير پروېزخټک ووئيل خبره به هغه وخت جوړه شي چې په لويديځه لار ټولې منصوبې عملي کړی شي .
او د جماعت اسلامي مشر سراج الحق وئيلي د چېن په ډول دې پاکستان هم خپلو پاتې پسمانده علاقو پله زياته توجه وګرځوي .
د چين او پاکستان دغه اقتصادي راهداري چې د ۴۶ اربه ډالرو په لګښت به پرې د چين د کاشغر نه تر د پاکستان د ګوادر پورې د مواصلاتو (سړکونو) او د صنعتي زونو خورولو ادعاوې کيږي ، او اقتصادي راهدارۍ ته د سيمې د قسمت بدلولو منصوبې نوم ورکول کيږي خو مخالفه ګوندونه پرې د تحفظاتو څرګندونې کوي .
په دغه لړ کې روانه مياشت د پښتونخوا اولسي تحريک، جمعيت علمااسلام (ف) ډلې، د بلوچستان قام پرستوګوندونو او د خېبرپښتونخوا حکومت لخوا د تحفظاتو د څرګندونو په موخه ټول ګونديزې غونډې شوي دي ، دويې وئيلي د مسلم ليګ (ن) ډلې مرکزي حکومت ورسره تشې ژمني کوي او د اقتصادي راهدارۍ ټولې ګټې پنجاب صوبې ته وړي .
په ټول ګونديزو غونډو کې اقتصادي راهدارۍ کې خېبرپښتونخوا او بلوچستان صوبې ته د پوره حقونو نه ورکولو په سر د مرکزي حکومت په وړاندې د تحريک چلولو او مبارزې دړکه ورکړل شوې وه .
