د افغانستان د هلمند صوبې امنيتي چارواکو ويلي په دغه صوبه کې جګړې زور اخستی او په تېرو دوه ورځو کې د طالبانو سره نښتو کې ۵۷ پوليس وژل شوي او ۳۷ ژوبل شوي دي .
افغان خبري ادارې پژواک د ګل په ورځ د يو پوليس چارواکي جنرال عصمت الله دولتزي له خلی پخلی کړی چې د هلمند په دوه ضلعو کې نښتو کې ۵۷ پوليس وژل شوي او ۳۷ نور ژوبل شوي دي .
راپورونه وايي وسله والو مخالفينو د تېرو درېو ورځو راهسې د هلمند په نادعلي، ګرشک او مارجې ضلعو کې د افغان امنيتي ځواکونو په پوستو پراخه بريدونه کړي دي او جګړه اوس لښکر ګاه پورې رسېدلې ده .
چارواکو ويلي په دغو نښتو کې وسله والو مخالفينو ته هم درنه مرګ ژوبله اوختې خو کره شمېره يې نه ده معلومه .
امنيتي چارواکو ويلي لښکرګاه کې تېره ټوله شپه جګړه روانه وه او وسله والو د مارجې سره مېلاويدونکي سړک باندې څلور پوستې قبضه کړي دي .
چارواکي وايي دا وخت هم په لښکرګاه کې توده جګړه روانه ده .
امنيتي چارواکو ويلي د طالبانو په شا تمبولو دپاره عمليات دوام لري او امنيتي ځواکونو مخالفينو ته لوې زيان اړولی دی .
هلمند د افغانستان تر ټولو غټه صوبه ده کومه چې د کوکنارو د توليد دپاره هم مشهوره ده .
بل لور ته د افغانستان د دفاع وزارت ويلي چې هلمند صوبه کې وسله وال مخالفين فعاليت لري خو دومره هم نه دي چې د امنيت دپاره داندېښنې وړ دي .
د طالبانو د نوي مشر هېبت الله اخندزاده د مشرۍ نه پس د افغان حکومت مخالفه وسله والو خپل عمليات نور تُند کړي دي .
د افغان طالبانو مشر ملامنصور د مئي په ۲۱م نېټه د پاکستان بلوچستان صوبې په لرې پرته سيمه نوشکي کې بي پائيلټه امريکايي ډرون بريد کې وژل شوی ؤ او ملاهيبت الله اخندزاده د هغه په ځاې د طالبانو نوی مشر ټاکل شوی دی .
څيړونکي وايي د هيبت الله په مشرۍ به طالبان خپل عمليات تېزوي او د دې تاثر لرې کولو هڅه به کوي چې ګنې د هغوې د مشر وژل کېدو سره دوې کمزوري شوي دي .
