تُندروه ډلې داعش ادعا کړې چې د ترکي په استنبول ښار کې د نوي کال په موقع د شپې په یو کلب باندې شوی برید دغه ډلې کړی دی.
داعش ډلې نن د ګل په ورځ یو بیان کې ویلي دغه برید يې د خلافت یو سرتيري کړی دی.
بل لور ته د ترکي چارواکي وايي په کلب باندې د برید کوونکي د لټون دپاره عملیات دوام لري.
د خالي په شپه ترسره شوي دې برید کې د بهر ملکیانو په ګډون لږترلږه ۳۹ کسان وژل شوي او نزدې ۷۰ نور ژوبل شوي وو.
په وژل شوؤ کې ۲۵ بهر ملکیان چې پکې د اُردن، لبنان، اسرائیل، سعودي عرب، عراق او کېنېډا وګړي شامل وو.
د اتوار په ورځ د ترکي وزیراعظم بن علي یلدرم ویلي چارواکو سره يې د مشکوک بریدګر په اړه کوم ډاګيز مالومات نشته.
نوموړي ویلي (ځینې مالومات مخې ته راغلي ولې انتظاميه سره یې د کره نتیجو دپاره نور کار کوي).
د استنبول په خوندي علاقه کې د شپې په کلب هغه وخت برید شوی ؤ چې په دغه ځای کې نزدې ۶۰۰ کسان موجود وو.
چارواکو ویلي د برید وروستو نه وروستو چې خلک کله د برید نه د وتلو په هڅه کې وو په دغه وخت کې بریدګر هم د خلکو سره وتلی دی.
د ترکي صدر رجب طیب اردوان په یو بیان کې دغه برید ظالمانه عمل ويلي ؤ، نوموړي ویلي چې ترکي به یو موټی وي او د ترهګرۍ دغه لوبه به سمېدو ته نه پرېږدي.
