لاس رسیدونکی لینک

تازه خبر

نوازشریف: عدالتونه او عمران خان زما په ضد یو شوي دي.


د پاکستان پخوانی وزیراعظم میا نواز شریف وايي، د ده خلاف د اعلی عدالتونو ژبه او رویه هماغه ده کومه چې د ده د سیاسي غلیم عمران خان ده.

د بډو رشوتونو په یوه قضیه کې احتساب عدالت ته تر حاضرېدو وړاندې له میډیا سره په خبرو کې نواز شریف د پاکستان په عدالتونو کې پر ناستو قاضیانو سختې نیوکې وکړې.

نوازشریف وایي، "د هغو قاضیانو له خوا راته د اخلاقیانو درس راکول کیږي، چې خپله یې د یو پوځي آمر په لاس د خپلې څوکۍ سوګند پورته کړی دی".

په ٣ نومبر ٢٠٠٧م کال کې د پاکستان د هغه وخت پوځي آمر جنرل پروېز مشرف "لنډ مهاله اساسي قانون" یا "پي سي او" نافذ کړې وه او له قاضیانو نه یې د همدې قانون له مخې د سوګند پورته کولو غوښتنه کړې وه.

د پاکستاني عدالتونو ځینو قاضیانو د دې امر له منلو انکار هم کړی وو.

نواز شریف په ١٩٩٠م کال کې د پاکستان وزیراعظم جوړ شو، خو په ١٩٩٣م کال کې د پاکستان د طاقتور پوځ په اشاره د هغه وخت صدر غلام اسحاق خان دی د وزارت لپاره نااهله وګرځاوه او منتخب پارلیمان یې فارغه کړ.

په دویم وار په ١٩٩٩م کال کې د هغه وخت پاکستاني جنرل مشرف له خوا د کودتا له لارې برطرفه کړل شو.

په درېیم ځل د جولای میاشت په ٢٨مه نېټه په ٢٠١٧م کال کې د پاکستان ستر عدالت د پانامه رسوایۍ په قضیه کې نوموړی په دې تور چې د قانون له مخې صادق او امین ثابت نه شو، عدالت نواز شریف له خپلې څوکۍ نه برطرفه کړو.

د پاکستان په پنجاب ایالت کې فعاله د مسلم لیگ (ن) ډلې دا مشر وايي، "دې وار د عدالت د فیصلې تر ‍شا د هېواد د طاقتور پوځ لاس وو".

د پانامه رسوایۍ کېسونه د پاکستان پر نورو سیاستوالو هم شوي او د نواز شریف سیاسي غلیم د تحریک انصاف ډلې مشر عمران خان هم په دې تور محاکمه شوی وو.

عمران خان په دغه قضیه کې د هېواد ستر عدالت بري کړی دی.

د مسلم لیگ (ن) ډلې مشر د عمران خان په اړه د عدالت په فیصله نیوکې کوي او دریځ لري، چې عدالت په یو شان قضیه کې د دواړو تر منځ فرق کړی دی.

نواز شریف اوس د عدالتي فیصلې او په دې کې د پوځ د مداخلې په ضد مبارزه پیل کړې ده.

پخوانی وزیراعظم دا هم وايي، " پاکستان کې عدالتونو تل د سیاسي مشرانو خلاف کاروایۍ کړي او د پوځي آمرانو پر سرغړونو غلي پاتې شوي".

د پاکستان په عدالتونو داسې نیوکې د نااهله ګرځول شوي وزیراعظم نه علاوه نور خلک هم کوي او د امریکې وتلې ورځپاڼې نیویارک ټایمز هم په دې اړه د نامتو لیکوال سلمان مسعود یو تفصیلي معلوماتي مضمون چاپ کړی دی.

د مضمون په پیل کې لیکل شوي دي، "د پاکستان اعلی عدالت د خلکو د حقوقو د محافظ کردار اختیار کړی دی، خو خلک دې ته انصاف نه وايي".

مضمون د پاکستاني خبریال مطیع الله جان له خولې لیکي، " د عدلیې پلویتوب د عدالتونو څېره بدرنګه کړې ده او خپل کار ته یې سیاسي رنګ ورکړی دی".

مطیع الله جان وړاندې لیکي، " د بدقسمتۍ خبره دا ده چې په پاکستان کې پوځ او عدلیه په ولس کې د ځان د مشهورتیا لپاره ښه په ډاګه سیاسي له حکومت سره مقابله کوي".

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG