لاس رسیدونکی لینک

Breaking News

نیکولسن: پر طالبانو به د خبرو لپاره سیاسي او پوځي دواړه فشارونه پر ځای ساتو


په افغانستان کې د ناټو او امریکايي ځواکونو مشر جنرال جان نیکولسن ویلي، د سیاسي مذاکراتو له لارې خبرو ته د طالبانو له رضا کولو پرته به پر هغوی پوځي فشار هم پر ځای ساتي.

د افغانستان په پروان ایالت کې د یوې امنیتي غونډې په وخت امریکايي جنرل وویل:

"زموږ مقصد د امن له لارې د دې جنګ حل لټول دي، خو موږ ته علم دی چې دا کار هله ممکن دی چې دوښمن تر فشار لاندې راوستل شي".

د جنرال نیکولسن دا بیان په داسې وخت کې مخې ته راغلی چې د امریکا دفاع وزارت خپلې ژمنې تکرار کړي، چې په افغانستان کې د جګړې تر ختمېدو به له افغان ځواکونو سره د امریکا مرسته دوام ولري.

افغان مطبوعاتي رپوټونه وايي، د ایتلافي عسکرو امریکايي قومندان په دغو خبرو کې له وسلوالو طالبانو سره د پاکستان د مرستې ذکر هم وکړ او زیاته یې کړه، چې واشنګټن دې مسئلې ته د ځواب ویلو لپاره پر پاکستان فشار زیات کړی دی.

پاکستان اوس افغان طالبان یو سیاسي فریق بولي. د دې هېواد د بهرنیو چارو وزیر خواجه اصف د زیارت-پنجشنبې په ورځ وویل، چې هېواد یې له افغان حکومت سره د طالبانو په مخامخ خبرو کې مرستې ته حاضر دی:

د صدر اشرف غني له خوا طالبانو ته د سولې د خبرو اترو وړاندیز یو مثبت ګام دی، طالبان یوه سیاسي ډله ده او افغانستان د دوی وطن دی

"د صدر اشرف غني له خوا طالبانو ته د سولې د خبرو اترو وړاندیز یو مثبت ګام دی، طالبان یوه سیاسي ډله ده او افغانستان د دوی وطن دی".

د امریکا دفاع وزارت په دې اړه په خپل یوه بیان کې ویلي، د افغان جګړې تر ختمون پورې به د افغان عسکرو مرسته جاري ساتي. طالبانو د ته ولسمشر غني له خوا د مذاکراتو د وړاندیز په اړه د امریکا د دفاع وزارت ویاندې ډانا وایټ وايي:

"طالبان به له تشدده لاس اخلي، جنګ به پرېږدي او افغان اساسي قانون به مني. دا بیا په افغان ولس پورې اړه لري چې تر اصل سیاسي حل پورې ورسېږي".

د طالبانو له خوا تر اوسه د افغان حکومت د پخلاینې او مذاکراتو پلان ته څه رسمي ځواب نه دی ویل شوی خو د ډلې ویاند ذبیح الله مجاهد د نیویارکر مجلې بارنیټ روبن ته څو ورځې وړاندې په لیکل شوي پرانیستي لیک کې ویلي وو:

"زموږ هېواد نیول شوی او پر موږ د امریکا غوندې یو سیاسي حکومت مسلط کړل شول. له دوی سره زموږ خبرې او د دوی حیثیت منل هماغه لار خپلول دي، چې امریکا په دې جنګ کې د بریالتوب په هیله ورباندې روانه ده".

د جنرال نیکولسن د جمعې په ورځ له طالبانو سره د امن مذاکراتو په اړه دا بیان د کابل تر غونډې یوه ورځ وروسته راغلی، چې ولسمشر اشرف غني پکې پر طالبانو له تشدده د لاس اخیستو او د جګړې د پای ته رسولو غږ کړی وو.

له طالبانو سره د مذاکراتو لپاره وخت او نېټه نه ده ټاکل شوې خو مطبوعاتي رپوټونه وايي که په را روان پسرلي کې- چې عموماً طالبان پکې نوي وسلوال بریدونه پلانوي- د وسلوالو بریدونه کم شول، نو دا به اشاره وي چې دوی له تشدده پر شا کېدو ته تیار دي.

XS
SM
MD
LG